Ijtimoiy tarmoqlarda Toshkent davlat texnika universiteti talabalar turar joyidan talabalar majburiy ravishda ko‘chirilayotgani haqida xabarlar keng tarqaldi va jamoatchilikda turli muhokamalarga sabab bo‘ldi. Oliy ta’lim, fan va innovatsiyalar vazirligi matbuot xizmatining ma’lum qilishicha, mazkur bino hozirgi kunga qadar rasman foydalanishga topshirilmagan bo‘lib, mulkdor barcha belgilangan qoidalarni chetlab o‘tgan holda talabalarni muddatidan oldin joylashtirishga qaror qilgan.

Aniqlanishicha, Talabalar shaharchasidagi ushbu yotoqxona davlat-xususiy sherikchilik tamoyillari asosida barpo etilgan. Biroq binoda hali ham zarur muhandislik tarmoqlari, xususan, issiq suv ta’minoti va isitish tizimlari to‘liq ishga tushirilmagan va sinovdan o‘tkazilmagan. Shunga qaramay, tadbirkor hech qanday yo‘llanmalarsiz va o‘rnatilgan tartib-qoidalarga rioya qilmasdan yoshlarni binoga kiritgan. Ta’kidlanishicha, na universitet rahbariyati, na vazirlik bu noqonuniy harakatlardan oldindan xabardor qilingan.

Huquqni muhofaza qiluvchi idoralar va mutasaddi vazirlik vakillari vaziyatga aralashgandan so‘ng, yoshlarning xavfsizligini ta’minlash maqsadida ular binodan vaqtincha chiqarildi. Talabalar universitetning boshqa mavjud yotoqxonalariga joylashtirildi, boshqa OTMlardan kelganlar esa o‘zlarining ta’lim muassasalariga qaytarildi. Hozirgi vaqtda bino bo‘yicha kadastr hujjatlarini rasmiylashtirish va tegishli ruxsatnomalarni olish ishlari yakunlanmoqda. Vazirlik ma’lumotlariga ko‘ra, tadbirkor talabalardan olingan barcha mablag‘larni to‘liq qaytarib bergan.

Source: podrobno.uz