Mamlakatimizda aholi uchun transport xizmatlarining qulayligini oshirish hamda ichki turizmni rivojlantirish maqsadida muhim qaror qabul qilindi. Raqobatni rivojlantirish va iste’molchilar huquqlarini himoya qilish qo‘mitasi tomonidan berilgan rasmiy ma’lumotlarga ko‘ra, joriy yilning 16-oktabridan boshlab mahalliy yo‘nalishdagi aviaqatnovlar narxi o‘rtacha 20 foizgacha pasaytiriladi.

Ushbu o‘zgarishni amalga oshirish jarayonida mutasaddi idoralar tomonidan chuqur tahlillar olib borilgan. Xususan, parvozlarni tashkil etish bilan bog‘liq xarajatlarni optimallashtirish, yoqilg‘i va xizmat ko‘rsatish xarajatlarini maqbullashtirish imkoniyatlari baholandi. O‘rganish natijasida ishlab chiqilgan takliflar tegishli yuqori instansiyalar tomonidan ma’qullangach, Raqobat qo‘mitasi "Uzbekistan Airways" aksiyadorlik jamiyati bilan hamkorlikda amaldagi tarif siyosatini qayta ko‘rib chiqishga muvaffaq bo‘ldi.

Yangilangan tariflar tizimiga muvofiq, endilikda poytaxt Toshkent shahridan respublikaning boshqa hududlariga amalga oshiriladigan qatnovlar uchun bir tomonlama aviachiptalar narxi sezilarli darajada arzonlashmoqda. Bu esa nafaqat fuqarolarning yo‘l xarajatlarini qisqartirishga, balki huduslararo iqtisodiy aloqalar va ichki sayohatlar oqimining yanada faollashishiga xizmat qilishi kutilmoqda.

Source: www.gazeta.uz