Toshkent shahrida tijorat banklarining nomidan fuqarolarga qoʻngʻiroq qilib, ularning mablagʻlarini talon-toroj qilish hamda nomiga onlayn kreditlar rasmiylashtirish bilan shugʻullanib kelgan jinoiy guruhning faoliyatiga chek qoʻyildi. Mazkur jinoiy tarmoq tarkibida nufuzli banklardan birining bosh ofisi kiberxavfsizlik boʻlimi xodimi ham borligi aniqlangan boʻlib, bu holat moliyaviy muassasalardagi nazorat mexanizmlari yetarli darajada ishlamayotganini koʻrsatadi.
Huquqni muhofaza qiluvchi idoralar, jumladan, Davlat xavfsizlik xizmatining Sirdaryo viloyati boʻyicha boshqarmasi va viloyat Ichki ishlar boshqarmasi hamkorligida oʻtkazilgan tezkor-qidiruv tadbirlari natijasida mazkur noqonuniy sxemaning tafsilotlari fosh qilindi. Maʼlum boʻlishicha, Toshkent shahri va Toshkent viloyatida istiqomat qiluvchi 1989–2005-yillarda tugʻilgan besh nafar shaxs Mirobod tumanidagi noturar binoni ijaraga olib, maxsus soxta koll-markaz tashkil etgan.
Shuningdek, guruhga aloqador yana bir shaxs ijaraga olingan xonadonga noqonuniy GSM-shlyuz qurilmasini oʻrnatib, aloqa xavfsizligini chetlab oʻtishga erishgan. Tergov maʼlumotlariga koʻra, jinoiy guruhga Toshkent viloyatida yashovchi, 1979-yilda tugʻilgan va ilgari ham sudlangan shaxs rahbarlik qilgan boʻlib, u bu kabi noqonuniy amaliyotlarni muvofiqlashtirib borgan.
Firibgarlar oʻzlarining qora niyatlarini amalga oshirishda oʻta murakkab psixologik usullardan foydalangan. Ular fuqarolarga turli banklar nomidan qoʻngʻiroq qilib, goʻyoki firibgarlar ularning nomiga kredit olmoqchi ekanini aytib aldagan va shu bahonada shaxsiy maʼlumotlarni qoʻlga kiritib, bank kartalaridagi barcha pullarni oʻzlashtirgan. Shuningdek, jabrlanuvchilar nomiga onlayn kreditlar rasmiylashtirilib, katta miqdordagi qarzdorliklar yuklatilgan.
Dastlabki maʼlumotlarga koʻra, ushbu jinoiy yoʻl bilan topilgan umumiy qiymati 8 million AQSH dollariga teng mablagʻ kriptovalyuta koʻrinishida soxta MCHJlar orqali xorijiy davlatlarga chiqarilib, legallashtirilgan. Mazkur holat yuzasidan jinoyat ishi qoʻzgʻatilib, dastlabki tergov davomida ushbu noqonuniy tarmoqqa aloqador 10 nafar shaxs aniqlangan, biroq hozircha bankning nomi va pullar chiqarilgan aniq davlat sir saqlanmoqda.
Source: kun.uz