️ Oʻzbekistonda mamlakat energetika quvvatlarini kengaytirish va yangi bosqichga olib chiqish maqsadida ikkinchi va uchinchi atom elektr stansiyalarini barpo etish rejalashtirilmoqda. Bu haqda mamlakat rahbari Shavkat Mirziyoyev 16-oktabr kuni yoqilgʻi-energetika sohasidagi yirik investorlar bilan oʻtkazilgan ochiq muloqot chogʻida maʼlum qildi, deb xabar beradi matbuot xizmati.
️ Davlat rahbari oʻz nutqida hozirgi vaqtda birinchi atom elektr stansiyasi qurilishining amaliy bosqichi boshlanganini taʼkidlab oʻtdi. Shuning bilan birga, kelgusida qoʻshimcha ravishda yana ikkita stansiyani qurish niyati jiddiy ekanini qayd etdi va ertangi kungi muzokaralarda yangi hamkorlar hamda investorlar bilan aynan ikkinchi atom elektr stansiyasini qurish masalasi atroflicha muhokama qilinishini maʼlum qildi.
️ Shuningdek, prezident oʻz soʻzida mamlakatda uran ishlab chiqarish hajmi yildan-yilga oshib borayotganiga alohida eʼtibor qaratdi. Uning soʻzlariga koʻra, mazkur sohaga ulkan miqdorda sarmoyalar yoʻnaltirilib, zarur infratuzilma yaratilgan va boy tajriba toʻplangan boʻlib, bu kabi ulkan energetik loyihalarni amalga oshirishda muhim poydevor boʻlib xizmat qiladi.
Source: kun.uz