Poytaxt Toshkent shahrida 72 yoshli fuqaro soxta va'dalar va tahdidlar yo'li bilan tadbirkordan yirik miqdordagi mablag'ni tovlamachilik yo'li bilan qo'lga kiritishga urinishda aybdor deb topildi. Mazkur jinoyat ishi yuzasidan Buxoro shahar sudida ko'rib chiqilgan jinoiy ish tafsilotlari jamoatchilikka ma'lum qilindi.

Tergov materiallariga ko'ra, o'tgan yilning oktyabr oyida sudlanuvchi X.Yu. Buxoro viloyatida faoliyat yurituvchi yirik korxonalardan birining rahbariyati bilan bog'langan. O'zini go'yo O'zbekiston Respublikasi Prezidenti Administratsiyasining mas'ul xodimi sifatida tanishtirgan shaxs, korxonaga nisbatan shikoyat kelib tushgani va vaziyatni o'rganish uchun Buxoroga maxsus safar uyushtirishini bildirgan.

Ayblanuvchining iddao qilishicha, korxona 40 million dollar miqdorida kredit mablag'ini olgan, biroq tekshiruvlar davomida hujjatlarda mavjud bo'lmagan obyektlar ko'rsatilgan va zavodning o'zi aslida ishlamayotgani aniqlangan. Shundan so'ng u tadbirkorga hujjatlardagi kamchiliklarni go'yo o'zining yordami bilan bartaraf etishni taklif qilgan.

Jinoyat rejasini amalga oshirish jarayonida keksaygan firibgar tadbirkorni qo'rqitib, unga boshqa shaxslar korxonani egallab olishni rejalashtirayotganini uqtirgan. O'zining "himoyasi" va muammolarni hal qilib berishi evaziga u naqd 500 ming dollar hamda safar xarajatlari uchun 1,3 million so'm talab qilgan. Huquq-tartibot idoralari xodimlari tomonidan o'tkazilgan tezkor tadbir davomida soxta mulozim tadbirkor tomonidan bank kartasiga o'tkazilgan 10 million so'm mablag'ni olayotgan paytda qo'lga olingan.

Sud majlisida ayblanuvchi o'z qilmishidan pushaymonligini bildirib, yoshi bir joyga borib qolganini vaj qilib, sudyadan jazo chorasini yumshatishni so'ragan. Biroq Buxoro shahar jinoyat ishlari sudi uning vajlarini yetarli deb topmadi va Jinoyat kodeksining 165-moddasi 3-qismi "a" bandi (juda ko'p miqdorda tovlamachilik) bo'yicha aybdor deb topib, 8 yil muddatga ozodlikdan mahrum etish jazosini tayinladi.

Source: uznews.uz