Coca-Cola Ichimligi Uzbekistan kompaniyasi Professional futbol ligasi bilan hamkorlikda talabalar o'rtasida an'anaviy tarzda o'tkazib kelinayotgan Coca-Cola Student’s Cup futbol turnirining navbatdagi mavsumini yakunladi. Mazkur musobaqa yoshlar o'rtasida sog'lom turmush tarzini targ'ib qilish hamda talabalar sportini qo'llab-quvvatlashga qaratilgani aytiladi.

Joriy mavsumda respublika bo'ylab jami 68 ta jamoa ishtirok etib, g'oliblik uchun keskin va murosasiz bahslar olib bordi. Final bosqichiga qadar yetib kelgan Stars va Renessans jamoalari hal qiluvchi uchrashuvda o'zaro kuch sinashdi, yakunda esa Renessans jamoasi raqibidan ustun kelib, chempionlik unvonini qo'lga kiritdi.

Musobaqaning faxriy mehmoni sifatida taniqli o'zbekistonlik futbolchi, milliy terma jamoaning sobiq sardori va O'zbekiston futbol assotsiatsiyasi vitse-prezidenti Odil Ahmedov tashrif buyurdi. U yosh sportchilarni shaxsan tabriklab, ularga o'zining maslahatlari va iliq tilaklarini bildirdi, bu esa yoshlar uchun qo'shimcha motivatsiya bo'ldi.

Tashkilotchilarning ta'kidlashicha, bunday yirik loyihalar yoshlarning sportga bo'lgan qiziqishini oshirish va ular o'rtasida jamoaviy ruhni mustahkamlashga xizmat qiladi. Turnir qatnashchilari esa bu kabi musobaqalar nafaqat o'z universitetini munosib himoya qilish, balki yangi do'stlar orttirish uchun ham ajoyib imkoniyat ekanini e'tirof etishdi.

Source: uznews.uz