Osiyo taraqqiyot banki (OTB) O‘zbekistonda elektr energiyasini taqsimlash tarmog‘ini modernizatsiya qilish maqsadida 200 million dollar miqdorida qarz ajratishni ma'qulladi. Tegishli bitim 15-oktabr kuni Tailand poytaxti Bangkok shahrida OTB rahbariyati va mamlakat rasmiylari tomonidan imzolangan bo‘lib, u energetika infratuzilmasidagi mavjud muammolarni hal qilishga qaratilgan.

Rasmiy ma'lumotlarga ko‘ra, ajratilayotgan mablag‘lar doirasida respublika bo‘ylab strategik ahamiyatga ega bo‘lgan 60 ta elektr taqsimlash podstansiyasi tubdan rekonstruksiya qilinadi. Shuningdek, tarmoqlarni boshqarish jarayonini yaxshilash va energiya yo‘qotishlarini qisqartirish maqsadida zamonaviy raqamli tizimlar joriy etilishi rejalashtirilgan.

Mutaxassislarning ta'kidlashicha, mamlakatda iqtisodiy o‘sish va shaharlarning kengayishi fonida energiya tarmoqlariga tushadigan yuklama keskin ortgan. Eskirgan infratuzilma elektr ta'minotining barqarorligiga salbiy ta'sir ko‘rsatib, yangi qayta tiklanuvchi energiya quvvatlarini tarmoqqa ulashda qiyinchiliklar tug‘dirayotgan edi.

Dasturni amalga oshirish natijasida kamida 3,3 gigavatt quvvatga ega qayta tiklanuvchi energiya manbalarini umumiy tarmoqqa ulash uchun zarur shart-sharoitlar yaratiladi. Shuningdek, loyiha orqali zararli issiqxona gazlari chiqindilarini yiliga qariyb 23 ming tonna karbonat angidrid ekvivalentiga kamaytirish ko‘zda tutilgan.

Ta'kidlash joizki, ushbu tashabbus OTB va Jahon bankining o‘zaro ishonch mexanizmi doirasida energetika sohasida amalga oshirilayotgan ilk qo‘shma dasturi hisoblanadi. Bu esa ortiqcha byurokratik jarayonlarni qisqartirib, mablag‘lardan yanada samarali foydalanish imkonini beradi.

Source: kun.uz