O‘zbekiston janubida mamlakat harbiylari va Rossiya kontingenti ishtirokida “Hamkorlik-2026” qo‘shma taktik o‘quv mashg‘ulotlari rasman boshlandi. Termiz poligonida o‘tkazilayotgan mazkur tadbir doirasida tomonlar chegaraoldi hududlarida shartli qurolli guruhlarni aniqlash va yo‘q qilish bo‘yicha qo‘shma harakatlarni ishlab chiqishni rejalashtirmoqda.
Mazkur harbiy tadbirlarda qatnashish uchun Rossiyaning Markaziy harbiy okrugiga qarashli 201-harbiy bazasining bo‘linmalari O‘zbekiston hududiga yetib keldi. Olingan ma'lumotlarga ko‘ra, Rossiya harbiylari Tojikiston va O‘zbekiston hududlaridagi tog‘ yo‘llari bo‘ylab 300 kilometrdan ortiq masofani bosib o‘tgan.
Murakkab tog‘ sharoitidagi marsh davomida kolonna tik qiyaliklar, burilishlar va tor serpentin uchastkalaridan o‘tishga majbur bo‘ldi. Harakatlanish vaqtida BТР-82A zirhli transportyorlari, “Ural” avtomobillari hamda “KamAZ” bazasidagi maxsus texnikalardan foydalanildi. Poligon hududiga yetib kelgach, shaxsiy tarkib texnikalarni amaliy bosqichga tayyorlash ishlarini boshlab yubordi.
O‘quv mashg‘ulotlari davomida tog‘ va shturm bo‘linmalari, razvedka hamda zarbdor uchuvchisiz uchish apparatlari hisob-kitoblari, shuningdek, yer usti robototexnika majmualari va Mi-24 vertolyotlari jalb etilishi kutilmoqda. Mashg‘ulotlar 27-oktabrga qadar davom etishi ko‘zda tutilgan.
Source: podrobno.uz