Toshkent shahrida turar joy binolari orasida, maktablar hamda bolalar bog‘chalari yaqinida mikroo‘rmonlar barpo etish ishlari boshlanishi rejalashtirilmoqda. Poytaxt tumanlarida soyali sayr qilish ko‘chalari va yangi istirohat bog‘lari tashkil etilib, ko‘chat ekishning kuzgi mavsumi 10-noyabrdan boshlanishi ko‘zda tutilgan. Har bir tuman uchun alohida ko‘kalamzorlashtirish dasturi ishlab chiqilishi belgilangan.

Ushbu chora-tadbirlar Toshkent shahar hokimining qarori bilan "Yashil makon" umummilliy loyihasi doirasida amalga oshirilmoqda. Yangi ko‘chatlar ekish bilan bir qatorda, hujjatda daraxtlarni parvarish qilish tartibini o‘zgartirish, ariq hamda kanallarni tozalash va mahalliy aholining tashabbuslarini qo‘llab-quvvatlash masalalari ham o‘rin olgan.

Yo‘nalishlardan biri to‘laqonli bog‘ tashkil etish imkoni bo‘lmagan kichik maydonlarda mikroo‘rmonlar barpo etishdan iborat. Ularni ko‘p qavatli uylar oralig‘ida, ta'lim muassasalarining hovlilarida va bo‘sh yer maydoni cheklangan mahallalarda joylashtirish rejalashtirilgan. Mikroo‘rmonlar uchun 200 kvadrat metrdan 1000 kvadrat metrgacha bo‘lgan uchastkalar ajratilib, har bir kvadrat metrga kamida ikkitadan daraxt va buta ko‘chatlari ekilishi ko‘zda tutilgan.

Source: podrobno.uz