Toshkent shahrida Markaziy Osiyo davlatlari favqulodda vaziyatlar idoralari rahbarlarining muhim mintaqaviy forumi o'z ishini boshladi. Mazkur tadbir transchegaraviy xususiyatga ega bo'lgan favqulodda vaziyatlarning oldini olish va ularni bartaraf etish borasidagi o'zaro hamkorlik masalalariga bag'ishlangan bo'lib, unda mintaqaning yetakchi mutaxassislari qatnashmoqda.
Tadbir davomida O'zbekiston favqulodda vaziyatlar vaziri Azizbek Ikromov nutq so'zlab, mintaqa mamlakatlari sa'y-harakatlarini birlashtirish zarurligini ta'kidladi. Uning so'zlariga ko'ra, favqulodda vaziyatlarning oldini olish va ularning oqibatlarini tugatishda hamkorlikni kuchaytirish eng muhim vazifalardan biri hisoblanadi. Shuningdek, u shoshilinch xizmatlar ishiga sun'iy intellekt texnologiyalarini joriy etish hamda erta xabardor qilish tizimlarini rivojlantirish ustuvor yo'nalishlar ekanini qayd etdi.
Ikki kun davom etgan anjuman doirasida ekspertlar ishtirokidagi panel sessiyalari va delegatsiya rahbarlarining ikki tomonlama uchrashuvlari tashkil etildi. Yakuniy kunda esa Markaziy Osiyo mamlakatlari favqulodda vaziyatlar idoralari rahbarlari hamda BMT, BMT Taraqqiyot dasturi va GIZ vakillari o'z ma'ruzalari bilan chiqish qildilar.
E'tiborli jihati shundaki, ilk bor mazkur forumda Ozarbayjon Favqulodda vaziyatlar vazirligi delegatsiyasi kuzatuvchi maqomida ishtirok etmoqda. Bu esa mintaqalararo aloqalarning kengayib borayotganidan dalolat beradi.
Forum yakunlari bo'yicha aholi va hududlarni tabiiy hamda texnogen xususiyatdagi favqulodda vaziyatlardan himoya qilishga qaratilgan mintaqaviy loyihalarni amalgaetish uchun asos bo'ladigan qator muhim hujjatlar imzolanishi kutilmoqda.
Source: podrobno.uz