Mamlakatimizda qishloq xo‘jaligi sohasini yanada rivojlantirish va aholi bandligini ta'minlashga qaratilgan navbatdagi muhim tashabbus e'lon qilindi. Xususan, respublikada limon yetishtirishga mo‘ljallangan energiya tejamkor zamonaviy issiqxonalarni barpo etish va ularni tayyor holatda biznes vakillariga topshirish rejalashtirilmoqda. Ushbu loyihaning ilk bosqichi Baliqchi tumanida boshlanishi ko‘zda tutilgan bo‘lib, kelgusi yilda bunday majmualar mamlakatimizning boshqa hududlarida ham qad rostlaydi.
Yaqinda Prezident Shavkat Mirziyoyev limonchilik tarmog‘ini rivojlantirishga bag‘ishlangan maxsus loyiha taqdimoti bilan tanishdi. Unga ko‘ra, Baliqchi tumanidagi to‘qqizta mahalla yaqinida umumiy maydoni 100 gektarni tashkil etuvchi zamonaviy issiqxonalar quriladi. Mazkur majmualar tadbirkorlarga to‘liq ishga tayyor holda topshirilishi belgilangan. Bunda ishlab chiqarish jarayoni yagona zanjirga birlashtirilib, ko‘chat o‘tqazishdan tortib saralash, qayta ishlash, qadoqlash, saqlash va tashqi hamda ichki bozorlarga sotishgacha bo‘lgan barcha bosqichlar qamrab olinadi.
Loyihada kam ta'minlangan va ishsiz fuqarolarni qo‘llab-quvvatlashga alohida e'tibor qaratilmoqda. Xususan, 500 ta shunday issiqxonada kamida ming nafar mahalliy aholining bandligi ta'minlanishi kutilmoqda. Eng muhimi, oilalar birinchi limon hosilini kutib o‘tirishlari shart emas — daraxtlar meva berguniga qadar qator oralig‘ida turli tezpishar qishloq xo‘jaligi ekinlarini ekib, qo‘shimcha daromad topish imkoniyatiga ega bo‘ladilar.
Kelgusida Baliqchi tumani tajribasini respublikaning barcha hududlariga tatbiq etish rejalashtirilgan. Xususan, kelgusi yilda mamlakatimiz viloyatlarida umumiy maydoni 200 gektar bo‘lgan yangi issiqxona majmualari qurilib, bu orqali yana ikki mingga yaqin oilaning barqaror daromad manbai ta'minlanadi. Davlat rahbari ushbu tashabbusni moliyaviy qo‘llab-quvvatlash hamda aholini limon yetishtirish sirlariga o‘qitish xarajatlarini qoplab berish yuzasidan mutasaddi idoralarga aniq topshiriqlar berdi. Eslatib o‘tamiz, avvalroq O‘zbekiston Pokiston bozoriga limon, shuningdek, olma, anjir va achchiq qalampir eksport qilish uchun ruxsat olgani xabar qilingan edi.
Source: podrobno.uz