Joriy yilning ilk to'qqiz oyi davomida Toshkent shahrining migratsiya o'sishi 26 070 nafarni tashkil etdi. Milliy statistika qo'mitasi taqdim etgan so'nggi ma'lumotlarga ko'ra, poytaxt aholisining bunday ko'rsatkich bilan ortishi mamlakatdagi ichki migratsiya jarayonlari hanuzgacha faol kechayotganidan dalolat beradi.

Hisobot davrida poytaxtga jami 91 142 kishi ko'chib kelgan bo'lib, ularning mutlaq qismi — 89 746 nafari respublikaning boshqa viloyatlaridan kelganlar hisoblanadi. Shuningdek, mazkur davrda xorijiy davlatlardan kelib Toshkentda qonuniy yashay boshlaganlar soni 1 396 nafarni tashkil etgan.

Shu bilan birga, ko'rib chiqilayotgan vaqt oralig'ida poytaxtdan boshqa hududlarga yoki chet elga ketganlar ham talaygina bo'ldi. Xususan, 65 072 kishi Toshkentni tark etgan bo'lib, ulardan 64 490 nafari respublika ichidagi boshqa hududlarga ko'chgan, yana 582 nafari esa doimiy yashash uchun xorijga chiqib ketgan.

Hisob-kitoblarga ko'ra, ichki migratsiya oqimi hisobiga poytaxt aholisi 25 256 kishiga ko'paygan bo'lsa, xalqaro migratsiya balansidan qo'shilgan qism 814 nafarni tashkil etdi. Natijada Toshkent shahri mutlaq migratsiya o'sishi bo'yicha mamlakatimiz hududlari orasida yaqqol peshqadamga aylandi.

Mamlakat miqyosida umumiy ahvolga qaraydigan bo'lsak, yanvar-sentyabr oylarida respublika bo'yicha 262 860 kishi kelgani, 267 144 kishi esa ketgani qayd etilgan. Xususan, tashqi migratsiya bo'yicha chet eldan 2 114 kishi kelgan bo'lsa, 6 398 kishi mamlakatni tark etgan, natijada umumiy balans manfiy ko'rsatkichni — minus 4 284 kishini tashkil qildi.

Source: uznews.uz