Mamlakatimizda sog‘liqni saqlash sohasini rivojlantirish, aholi salomatligini mustahkamlash va yuqori malakali kadrlar tayyorlash yo‘lidagi ko‘p yillik samarali mehnati uchun bir guruh tibbiyot xodimlari davlat mukofotlari bilan taqdirlandi. Prezident imzolagan tegishli farmonga muvofiq, mamlakatimiz taraqqiyotiga munosib hissa qo‘shib kelayotgan mutaxassislarga faxriy unvonlar, orden va medallar topshirildi.

Taqdirlash marosimi joriy yilning 27-oktabr kuni poytaxtimizdagi “Ko‘ksaroy” qarorgohida yuqori saviyada bo‘lib o‘tdi. Unda mamlakatimizning turli hududlaridan tashrif buyurgan malakali shifokorlar, olimlar, o‘rta tibbiyot xodimlari hamda soha faxriylari o‘zlarining qator yutuqlari e'tirof etilganidan mamnuniyat bildirishdi.

Xususan, sog‘liqni saqlash va farmatsevtika tarmoqlarini isloh qilishdagi xizmatlari, sog‘lom turmush tarzini keng targ‘ib etishdagi faolligi hamda jamiyat hayotidagi ishtiroki inobatga olinib, bir qator yetakchi mutaxassislarga «O‘zbekiston Respublikasida xizmat ko‘rsatgan sog‘liqni saqlash xodimi» faxriy unvoni berildi. Shuningdek, boshqa qator taniqli shifokorlar «Fidokorona xizmatlari uchun», «Mehnat shuhrati», «Sog‘lom avlod uchun», «Do‘stlik» ordenlari hamda «Jasorat», «Shuhrat» medallari bilan mukofotlandilar.

Source: uznews.uz