Oktyabr oyining oxirlarida Toshkent shahri havo ifloslanishining keskin darajasi bo‘yicha dunyoning yirik shaharlari reytingida salbiy yetakchilikni qayd etdi. Xalqaro IQAir monitoring platformasining maʼlumotlariga ko‘ra, poytaxtda havo sifati indeksi xavotirli ko‘rsatkich — 185 ga yetgan va bu aholi salomatligi uchun jiddiy xavf tug‘diradigan «zararli» darajaga tenglashtirilgan.

Mazkur global reytingda Toshkentdan keyingi o‘rinlarni Indoneziyaning Jakarti shahri (170) hamda Bishkek (165) band qilgan. Shuningdek, Dubay, Milan, Lohur, Mumbay va Dehli kabi yirik megapolislarda ham havo sifati yomonlashgani kuzatilib, ekologik vaziyat barcha mintaqalarda jiddiy xavotir uyg‘otayotgani maʼlum qilingan.

Mutaxassislarning tushuntirishicha, AQI shkalasi bo‘yicha 151–200 oralig‘idagi ko‘rsatkich har qanday inson organizmiga salbiy taʼsir ko‘rsatishi mumkin. Xususan, bolalar, keksalar, homilador ayollar hamda yurak-qon tomir va nafas yo‘llari xastaliklari bo‘lgan fuqarolar xavf guruhiga kirib, ularda jiddiy asoratlar kuzatilishi ehtimoli yuqori.

Shahar hokimiyati va ekologiya mutaxassislari bunday noqulay ob-havo sharoitida ochiq havoda uzoq vaqt qolmaslikni, faol jismoniy mashqlarni keyinga qoldirishni tavsiya qilmoqda. Mutaxassislar oddiy tibbiy niqoblar mayda zarrachalardan himoya qilmasligini eslatib, N95/FFP2 toifasidagi respiratorlardan foydalanish zarurligini taʼkidlashmoqda.

Ushbu ekologik muammoning sabablari tahlil qilinganda, geografiya fanlari doktori Baxtiyor Xolmatjonovning so‘zlariga ko‘ra, sovuq mavsumda shamol tezligining pasayishi, harorat inversiyasi va antitsiklonal jarayonlar asosiy omil bo‘lmoqda. Iqlim o‘zgarishi milliy markazi maʼlumotlariga ko‘ra, oylik meʼyordagi yog‘ingarchilikning keskin kamligi ham chang zarrachalarining atmosfera qatlamidan tabiiy ravishda tozlanishini qiyinlashtirmoqda.

Source: kun.uz