O'zbekiston hududida ekologik nazorat tadbirlari keskinlashtirilib, Namangan viloyatida faoliyat yurituvchi g'isht zavodlaridan birining ishi vaqtincha to'xtatildi. Bu haqda Milliy ekologiya va iqlim o'zgarishi qo'mitasi tomonidan 29-oktabr kuni rasman ma'lum qilindi, deb yozadi Podrobno.uz nashri.

Mutaxassislarning ta'kidlashicha, tekshiruv davomida mazkur korxona tomonidan atmosferaga me'yordan ortiq chang va zararli gazlar chiqarilayotgani aniqlangan. Aniqlangan qoidabuzarliklar yuzasidan korxona rahbariyatiga kamchiliklarni bartaraf etish bo'yicha majburiy ko'rsatmalar berilgan bo'lib, zavod faoliyati kamchiliklar bartaraf etilgunga qadar vaqtincha to'xtatib qo'yildi.

Shunga o'xshash reyd tadbirlari Andijon viloyatida ham o'tkazilib, mahalliy aholining havo ifloslanishi yuzasidan qilgan shikoyatlari o'rganib chiqildi. Fuqarolarning so'zlariga ko'ra, g'isht va ohak ishlab chiqarish korxonalaridan chiqayotgan tutun hamda chang nafas olishni qiyinlashtirib, jiddiy noqulayliklar tug'dirgan.

Ekologiya qo'mitasi vakillari korxonalardagi chang-gaz tozalash qurilmalarining holatini tekshirib, laboratoriya tahlillari uchun zarur namunalar olishdi. Olingan tahlil natijalariga asoslanib, qonunbuzarlarga nisbatan tegishli choralar ko'rilishi ta'minlanadi, shuningdek, Andijon viloyatida noqonuniy ravishda o'rnatilgan ikkita qo'lbola ohak pishirish pechi butunlay bartaraf etildi.

Hozirgi kunda respublikaning boshqa hududlarida ham ekologik talablarga rioya etilishini ta'minlash maqsadida nazorat reydlari davom ettirilmoqda. Avvalroq, ekologiya idoralari Toshkent shahrida havoning ifloslanishiga sabob bo'layotgan atmosferadagi inversiya holati yana o'n kun davom etishi mumkinligi haqida ogohlantirgan edi.

Source: podrobno.uz