Boku harbiy sudi sobiq Tog'li Qorabog' davlat vaziri, tadbirkor Ruben Vardanyanni 20 yil ozodlikdan mahrum qilishga hukm qildi. Bu haqda davlat agentligi Azertag xabar berdi. Ilgari ayblov tomoni umrbod qamoq jazosini talab qilgan edi.

Sud jarayoni 2025-yil yanvar oyida Bokuda boshlangan. Davlat nomidan jabrlanuvchi sifatida Ozarbayjon Vazirlar Mahkamasi apparati rahbari Rufat Mammadov chiqqan bo'lib, u prokuratura tomonidan taqdim etilgan dalillarga roziligini bildirib, suddan qaror chiqarishda ularni hisobga olishni so'ragan.

Vardanyan oilasi hukmni "dahshatli, lekin kutilgan" deb atadi. Qarindoshlarning so'zlariga ko'ra, sud jarayoni yopiq eshiklar ortida o'tkazilgan, ayblovlarga oid dalillar esa taqdim etilmagan. Ular, shuningdek, tadbirkorni va boshqa arman mahbuslarini ozod qilish uchun kurashish niyatida ekanliklarini aytishdi, ular bu mahbuslarni siyosiy deb hisoblaydi.

Vardanyan - tadbirkor va investor bo'lib, Forbes jurnali versiyasiga ko'ra, eng boy rossiyalik tadbirkorlar qatoriga kirgan. 2022-yil kuzida u rossiya fuqaroligidan voz kechdi va bu qaror Tog'li Qorabog' atrofidagi vaziyat bilan bog'liq ekanligini aytdi.

Tadbirkor 2023-yil sentyabr oyida Ozarbayjonning mintaqadagi harbiy operatsiyasidan keyin Armanistonga kirishga urinayotganda Ozarbayjon huquqni muhofaza qiluvchi organlari tomonidan ushlangan, bu operatsiya natijasida bahsli hudud Boku nazorati ostiga o'tgan. Shundan beri u qamoqda edi.

Tergov ma'lumotlariga ko'ra, Vardanyanga terrorizmni moliyalashtirish, noqonuniy qurolli tuzilmalar yaratish va Ozarbayjon davlat chegarasini noqonuniy kesib o'tish kabi 40 dan ortiq ayblovlar qo'yilgan.

Source: kun.uz