Farg‘onada bolalar ommaviy zaharlangan bog‘chalarga mahsulot yetkazib bergan Garden Catering Trade kompaniyasida ta’sischi o‘zgardi. 25-fevral holatiga ko‘ra, Mo‘ydinjon G‘ofurov ta’sischi sifatida qayd etilgan, 24-fevralda esa Iqboljon Bozorov bo‘lgan.

G‘ofurov Grand Super Montaj, Space Travel Rides Park va boshqa kompaniyalarda ulushlarga ega. Kompaniya rahbari Shavkat Turdaliyev esa Yangiqo’rg’on Fayz Qurilish, Delight Sale va boshqa kompaniyalarda ta’sischi yoki hamta’sischidir.

21-fevralda Farg‘ona shahridagi 3 ta bog‘chaning 62 nafar bolasi "o‘tkir diareya" tashxisi bilan kasalxonaga yotqizildi. Ulardan 3 nafari reanimatsiyada, ahvoli barqaror. Jinoyat ishi qo‘zg‘atildi.

Gazeta aniqlashicha, viloyat hokimligi kompaniyani qonunbuzarlik bilan tanlab olgan. Korrupsiyaga qarshi kurashish agentligi ogohlantirish e’tiborsiz qoldirilganini va tanlovda imtiyozlar berilganini bildirgan.

Kompaniya 2024-yilda "tajriba" doirasida viloyat hokimi Xayrulla Bozorovning qarori bilan bog‘chalarga ovqat yetkazib berish huquqini qo‘lga kiritgan. Qaror qabul qilinganda kompaniya bor-yo‘g‘i bir oylik edi. Maktabgacha ta’lim vazirligi tekshiruvi sanitariya qoidalariga rioya qilinmaganligini aniqlagan.

Raqobat qo‘mitasi hokimning qarorini bekor qilish haqida ko‘rsatma yuborgan, biroq u bekor qilinmagan. Korrupsiyaga qarshi kurashish agentligi ham qonunbuzarlikni aniqlagan, ammo hokimlik faqat "rasmiyatchilik javobi" bilan cheklangan.

Qonunbuzilishlarga qaramay, kompaniya faoliyatini davom ettirib, tendersiz 100 milliard so‘mdan ortiq shartnomalar imzolagan.

Eslatma: 2025-yil sentabr oyida Toshkent viloyatida 1000 dan ortiq bog‘cha bolasi zaharlangan edi, tergov natijalari hali oshkor etilmagan.

Source: www.gazeta.uz