Moskvada bo‘lib o‘tgan “Yevrosiyo” forumida 33 davlatdan 800 nafar ekspert ishtirok etdi. Forum ikki yillik faoliyat yakunlarini sarhisob qilib, tashkilotning yangi bosqichga – “qo‘shnichilik arxitekturasi” deb nomlangan barqaror xalqaro aloqalar tizimini yaratishga o‘tayotganini ko‘rsatdi.
Forumda Rossiya Prezidenti matbuot kotibi Dmitriy Peskov, TIV vakillari Mariya Zaxarova va Aleksandr Alimov, shuningdek, turli soha mutaxassislari qatnashdi. Asosiy mavzu – alohida loyihalardan umumiy gumanitar infratuzilmaga o‘tish edi.
“Yevrosiyo” koordinatsion kengashi rahbari Alyona Arshinova ta’kidlashicha, dasturlar ishtirokchilari soni 20 mingdan 120 ming kishiga oshgan. “Biz vositachilarsiz muloqot qilishni xohlovchi hamfikrlarni qidirmoqdamiz”, – dedi u.
Dmitriy Peskov Yevrosiyo xalqlarining tarixiy ildizlari chambarchas bog‘liqligini, an’anaviy qadriyatlar o‘tmishga tayanib, kelajakka yo‘naltirilganini ta’kidladi. “Birga ko‘p narsaga qodirmiz, alohida bo‘lsak, zaifmiz”, – dedi u.
Forumda Afrika yo‘nalishiga kengayish rejalari, jumladan, Togo delegatsiyasi ishtiroki va yangi hamkorlik platformalari yaratilishi muhokama qilindi. Markaziy Osiyo hamkorlik mexanizmlarini sinovdan o‘tkazish maydoni sifatida ko‘rildi.
Amaldagi loyihalar qatorida “G‘alaba 9/45” harakati doirasida 14 davlatda G‘alaba kuni tadbirlari, “Klass do‘stligi”, “Bolalik hududi”, “Rossiyani tanit” kabi ta’lim va yoshlar dasturlari, shuningdek, “Yevrosiyo” mukofoti va “Yevrosiyo Kinofest” loyihalari bor. Armanistonga 200 tonna gumanitar yordam yetkazilgan.
O‘zbekiston vakillari forumda faol ishtirok etdi. Arshinova O‘zbekistonda loyihalarni amalga oshirish imkoniyatlari ko‘rib chiqilayotganini, arizalar soni ortayotganini ma’lum qildi. “Yevrosiyo” kengashi a’zosi Ravshan Nazarov yoshlar va ko‘ngillilar harakati muhimligini, 2022-yilda tashkil etilgan Ko‘ngillilar uyushmasi bu yo‘nalishni jadallashtirganini ta’kidladi.
Kino prodyuseri Mannob Qo‘chqorov Yevrosiyo xalqlari umumiy madaniy kodga ega ekanini, O‘zbekiston qo‘shma kinoproizvodstvoda tajribaga ega ekanini aytdi. U pedagogik ta’limni madaniyat va kino sanoati rivojining asosi deb baholadi.
Forum yakunida ta’kidlanishicha, asosiy maqsad – alohida loyihalardan barqaror gumanitar, ta’lim va professional aloqalar tizimiga o‘tish. Bu modelning uzoq muddatli mexanizmga aylanishi keyingi bosqichda ko‘rinadi.
Source: podrobno.uz