Tayvan hukumati shanba kuni AQShdan so‘nggi qurol-yarog‘ paketini tasdiqlashni so‘radi. Bu AQSh prezidenti Donald Trampning Xitoy rahbari Si Szinpin bilan sammitidan so‘ng Tayvanni rasman mustaqillik e’lon qilishdan ogohlantirganidan keyin sodir bo‘ldi.

Prezident Tramp juma kuni Fox News telekanaliga bergan intervyusida kelajakdagi qurol savdosi haqida qaror qilmaganini aytdi. «Men buni qilishim ham, qilmasligim ham mumkin», dedi Tramp. Dekabr oyida Tramp ma’muriyati Tayvanga rekord darajadagi 11 milliard dollarlik qurol-yarog‘ paketini tasdiqlagan edi.

Reuters va The New York Times kabi nashrlar xabariga ko‘ra, yana bir 14 milliard dollarlik paket Trampning tasdig‘ini kutmoqda. Tayvan tashqi ishlar vaziri o‘rinbosari Chen Min-chi Tayvan Vashington bilan muloqotni davom ettirishini aytdi.

Tayvan prezidenti Lay Sin-te’ning matbuot kotibi Karen Kuo Xitoyning harbiy tahdidi Tinch okeani mintaqasidagi «yagona beqarorlashtiruvchi omil» ekanini ta’kidladi. «Tayvan va AQSh o‘rtasidagi harbiy savdo nafaqat AQShning Tayvan munosabatlari to‘g‘risidagi qonunda belgilangan xavfsizlik majburiyatining aksi, balki mintaqaviy tahdidlarga qarshi o‘zaro to‘xtatuvchi vositadir», dedi u.

Si Szinpin Tayvanni himoya qilish bo‘yicha AQSh majburiyatini zaiflashtirishga harakat qilmoqda. Pekin Tayvanni o‘z nazoratiga olish uchun harbiy kuch ishlatishni istisno qilmaydi. Pekindagi uchrashuvda Si Trampga Tayvan masalasini noto‘g‘ri hal qilish «o‘ta xavfli vaziyat»ga olib kelishi mumkinligini aytdi.

Tramp Tayvanni rasman mustaqillik e’lon qilmaslikdan ogohlantirdi: «Hech narsa o‘zgarmadi. Men hech kimning mustaqil bo‘lishini xohlamayman». Tayvan tashqi ishlar vazirligi Tayvan «suveren va mustaqil demokratik davlat» ekanini va Xitoy Xalq Respublikasiga bo‘ysunmasligini ta’kidladi.

Source: www.dw.com