Ukraina hukumati ma'lumotlariga ko'ra, Rossiya tungi vaqtda bir qator shaharlarga uchuvchisiz samolyotlar va raketalar bilan hujum qilgan. Natijada kamida 20 kishi jarohatlangan.

Odesa port shahrida turar-joy binolari, maktab va bolalar bog'chasi zarar ko'rgan. Mahalliy harbiy ma'muriyat rahbari Serhiy Lisakning Telegramdagi xabariga ko'ra, infratuzilmaga ham ziyon yetgan, biroq qurbonlar soni haqida ma'lumot yo'q.

Dnipro shahrida esa 18 kishi, jumladan bir bola yaralangan. Viloyat gubernatori Oleksandr Xanzha bu haqda Telegramda ma'lum qilgan.

Ukraina harbiy-havo kuchlari Rossiya 524 ta dron va 22 ta raketani uchirganini, havo hujumidan mudofaa tizimlari 503 ta dronni zararsizlantirganini bildirgan. Asosiy nishon Dnipro va uning atrofi bo'lgan.

Ayni paytda Rossiyaning Rostov viloyati gubernatori Yuriy Slyusar Taganrog, Kamensk va Azov tumanlarida havo hujumi qaytarilganini, dronlar yo'q qilinganini aytgan. Bu xabarlarni mustaqil tekshirish imkoni yo'q.

Ukraina prezidenti Volodimir Zelenskiy juma kuni Kiyevga qilingan halokatli zarbalardan so'ng javob choralarini va'da qilgan. Dam olish kunlarida u Ukrainaning uzoq masofali qurollari "vaziyatni sezilarli darajada o'zgartirmoqda" deb ta'kidlagan.

Source: www.dw.com