Eron milliy futbol terma jamoasi Jahon chempionati oldidan Turkiyada viza uchrashuvlarida qatnashdi. Butun jamoa Kanada vizasiga murojaat qilgan bo‘lsa, ba’zi futbolchilar AQShga kirish uchun ham hujjat topshirgan.

Eron futbol federatsiyasi rasmiysining Reuters agentligiga ma’lum qilishicha, bir qator futbolchilar payshanba kuni Turkiya poytaxti Anqarada arizalar topshirgan. Ba’zi o‘yinchilar fevral oyida AQSh va Isroil rejimining Eronga hujumidan oldin Amerika vizasiga murojaat qilmagan edi.

Chet elda o‘ynaydigan bir necha eronlik futbolchi Anqaradagi jamoaga qo‘shilgan, so‘ngra Turkiyaning O‘rta yer dengizi sohilidagi Antaliya shahridagi yig‘in lageriga yo‘l olgan.

Jahon chempionati AQSh, Kanada va Meksika tomonidan birgalikda o‘tkaziladi. Eron guruh bosqichidagi uchta o‘yinni AQShning g‘arbiy sohilida o‘tkazadi. Ular 15 iyun kuni Los-Anjelesda Yangi Zelandiya, 21 iyunda Belgiya bilan to‘qnash keladi, 26 iyunda esa Sietlda Misrga qarshi o‘ynaydi. Agar pley-offga chiqsa, Kanadaga kirish talab etiladi.

Eron chempionati mart oyida to‘xtatilgani sababli jamoa Turkiyada turnir oldidan tayyorgarlik lagerini o‘tkazmoqda. Murabbiy Amir G‘olenno‘yi jamoa tayyorgarligini yo‘lga qo‘yishga urinmoqda, chunki mahalliy liga o‘yinchilari yetti hafta davomida raqobatli futbol o‘ynamagan.

Eron 48 jamoadan iborat kengaytirilgan Jahon chempionatiga erta yo‘llanma olgan bo‘lsa-da, tayyorgarlik AQSh-Isroil rejimining Eronga urushidan keyin sayohat va xavfsizlik masalalari bo‘yicha noaniqliklar tufayli soyada qolmoqda. Eron futbol federatsiyasi avvalroq AQSh vizalari FIFA bilan muzokaralardan so‘ng Turkiyada hal qilinishini ma’lum qilgan edi.

Eron 29 may kuni Gambiya bilan o‘rtoqlik o‘yinini o‘tkazadi, so‘ngra G‘olenno‘yi FIFAning 1 iyun muddatiga qadar 26 kishilik yakuniy tarkibni e’lon qiladi.

Source: www.aljazeera.com