Fransiyada maktabgacha va boshlang‘ich ta’lim tizimida katta janjal avj oldi. Parijning 7-okrugidagi Saint Dominique munitsipal muassasasining 16 nafar xodimi bolalarga nisbatan zo‘ravonlikda gumonlanib hibsga olindi.

Hibsga olinganlar orasida tarbiyachilar, ta’lim tizimi xodimlari va uzaytirilgan guruh animatorlari bor, ularning yoshi 18 dan 68 gacha. Prokuratura ma’lumotlariga ko‘ra, ularga nisbatan shafqatsiz munosabatdan tortib jinsiy zo‘ravonlik va mansab vakolatini suiiste’mol qilishgacha bo‘lgan turli ayblovlar qo‘yilgan.

Ayrim gumonlanuvchilar ishdan chetlashtirilgan, qolganlari ko‘rsatma bermoqda. Tergov bir muassasa doirasidan chiqib ketdi: tekshiruvlar 84 ta bolalar bog‘chasi, 20 ta boshlang‘ich maktab va 10 ta yaslida mumkin bo‘lgan zo‘ravonlik holatlarini qamrab olmoqda.

2026 yil boshidan buyon Parijda munitsipal ta’lim tizimining 78 nafar xodimi ishdan chetlashtirilgan, ulardan 31 nafari jinsiy zo‘ravonlikda gumon qilinmoqda. Vaziyat ommaviy axborot vositalarida ilgari polis e’tiboriga tushgan tarbiyachining takroriy epizodlari haqidagi nashrlardan so‘ng keng jamoatchilik rezonansiga sabab bo‘ldi.

Parij meri Emmanuel Gregoire voqeani “mutlaq ustuvor vazifa” deb atadi va nazorat choralarini kuchaytirishga va’da berdi: ishga qabul tizimini qayta ko‘rib chiqish, tekshiruvlarni qattiqlashtirish va ota-onalar uchun to‘liq shaffoflikni ta’minlash. Shaharda zo‘ravonlikka qarshi 20 million yevrolik reja ishga tushirilgan.

Biroq hamma qattiq choralarni qo‘llab-quvvatlamaydi: kasaba uyushmalari ommaviy chetlashtirishlarni kadrlar tanqisligi sharoitida “repressiv siyosat” deb tanqid qilmoqda. Norozilik sifatida ular ish tashlash e’lon qildi. Shu bilan birga, ota-onalar tashkilotlari tergovni milliy darajaga kengaytirish va bolalarni himoya qilish bo‘yicha qo‘shimcha choralar ko‘rishni talab qilmoqda.

Source: podrobno.uz