AQSh federal sudi Salvador fuqarosi Kilmar Abrego Garsiyaga qarshi odam savdosi bo‘yicha ayblovni bekor qildi. Sudya Ueyver Krenshouning qaroriga ko‘ra, Adliya vazirligi ishni faqat Abrego Garsiya deportatsiyasiga qarshi sudga murojaat qilganidan keyin qayta ochgan.

“Sud bu xulosaga osonlik bilan kelmadi”, deb yozgan Krenshou. “Ob’ektiv dalillar shuni ko‘rsatadiki, agar Abrego o‘zining Salvadorga chiqarilishiga qarshi da’vo arizasi bilan muvaffaqiyat qozonmaganida, hukumat bu jinoiy ishni qo‘zg‘atmagan bo‘lardi.”

O‘tgan yili Abrego Garsiya prezident Donald Trampning noqonuniy migratsiyaga qarshi kurashi ramziga aylangan edi. U avvalgi sud qaroriga zid ravishda Salvador megaqamog‘iga yuborilgan, biroq keyinroq AQShga qaytarilgan.

Abrego Garsiya 2019-yildagi immigratsiya sudi qarori bilan Salvadorga qaytarilishdan himoyalangan edi, chunki sudya uning oilasiga tahdid solayotgan to‘da xavfini aniqlagan. Shunga qaramay, Tramp ma’muriyati uni yana uchinchi davlatga deportatsiya qilish niyatida ekanini bildirgan.

Sudya Krenshou ayblovning muddati “qasddanlik prezumpsiyasi” uchun asos bo‘lganini ta’kidladi. Milliy xavfsizlik departamenti ikki yil oldin yo‘l harakati to‘xtatilishi haqida bilgan va ishni yopgan, biroq Oliy sud Abrego Garsiyani Salvadordan qaytarish to‘g‘risida qaror chiqargach, ish qayta ochilgan.

Source: www.aljazeera.com