Isroilning G‘azo sektoridagi Nuseyrat qochqinlar lagerida joylashgan uyga uyushtirgan havo hujumi natijasida bir oilaning uch a’zosi, jumladan, olti oylik chaqaloq halok bo‘ldi. Bu haqda Falastin tibbiyot xodimlari ma’lum qildi.

Al-Aqsa shahidlar kasalxonasi vakillarining so‘zlariga ko‘ra, yakshanba kuni ertalab Muhammad Abu Mallouh, uning rafiqasi Alaa Zaqlan va ularning farzandi Usamoning jasadlari keltirilgan. Hujumda yana 10 ga yaqin kishi yaralangan.

Isroil armiyasi bu borada darhol izoh bermadi. AQSh vositachiligida o‘tgan yili tuzilgan “sulh”ga qaramay, Isroil Falastin hududidagi hujumlarini davom ettirmoqda.

G‘azo sog‘liqni saqlash idoralari ma’lumotlariga ko‘ra, oktyabr oyida kuchga kirgan sulhdan beri Isroilning deyarli kundalik hujumlari natijasida 900 ga yaqin odam halok bo‘lgan. Al-Jazira muxbiri Xani Mahmudning xabar berishicha, yakshanba kuni Isroil bombardimoni boshlanganida falastinliklar ko‘chirilish buyrug‘i ortidan qochib ketayotgan edi.

Isroil kuchlari, shuningdek, G‘azoning sharqiy qismida “Sariq chiziq” deb ataladigan hududda uylar va fuqarolik infratuzilmasini vayron qilishni davom ettirmoqda. Isroil samolyotlari Deir al-Balah markazidagi kasalxona yaqinida ham havo reydlarini amalga oshirib, katta zarar yetkazdi.

G‘azo hukumat matbuot kotibiyati sulhning dastlabki olti oyida kamida 2400 ta Isroil qonunbuzarligi, jumladan 1100 dan ortiq havo reydi va 921 ta tinch aholiga qaratilgan otishmalar qayd etilganini ma’lum qildi. 2023 yil oktabrdan beri Isroilning genotsid urushida 72 000 dan ortiq falastinlik halok bo‘lgan.

Shanba kuni Isroil hujumida besh nafar politsiyachi va 13 yoshli o‘smir halok bo‘lgan edi. Isroil va Hamas o‘rtasidagi urushni butunlay tugatish bo‘yicha muzokaralar to‘xtab qolgan, har ikki tomon bir-birini sulhni buzishda ayblamoqda. Human Rights Watch tashkiloti sulh boshlanganidan olti oy o‘tib ham G‘azodagi gumanitar infratuzilma xavf ostida qolayotganini ta’kidladi.

Source: www.aljazeera.com