Bloomberg milliarderlar indeksi ma'lumotlariga ko'ra, amerikalik tadbirkor va SpaceX asoschisi Ilon Maskning boyligi 1 trillion dollardan pastga tushib, hozirda 957 milliard dollarni tashkil etmoqda.
23-iyun kungi asosiy savdo sessiyasi boshida SpaceX aksiyalari 3,9 foizga arzonlashib, 148,57 dollarni tashkil qildi. Kompaniyaning kapitallashuvi 1,99 trillion dollargacha kamaydi. Shunday qilib, rekord darajadagi IPOdan keyin birinchi marta SpaceX kapitallashuvi 2 trillion dollardan pastga tushdi, bu esa kompaniyaning dunyodagi eng yirik ommaviy kompaniyalar reytingidagi o'rnini sezilarli darajada yo'qotishiga olib keldi. Ushbu savdo sessiyasi SpaceX uchun kapitallashuvning pasayishi bilan yakunlangan ketma-ket to'rtinchi sessiya bo'ldi.
Iyun oyida kompaniya IPO davomida 75 milliard dollar jalb qildi. Joylashtirishdan so'ng uning bozor kapitallashuvi 2,9 trillion dollardan oshdi (taxminan 2,99 trln ga yetdi), bu SpaceXga bir muddat Microsoft va Amazonni ortda qoldirib, dunyodagi eng qimmat ommaviy kompaniyalar to'rtligiga kirishiga imkon berdi. Biroq keyinchalik kompaniya qiymati birjaga chiqqandan keyin erishilgan eng yuqori ko'rsatkichlarga nisbatan pasaydi.
SpaceX IPOsi, shuningdek, Ilon Maskni dunyodagi birinchi trillionerga aylantirdi: Bloomberg hisob-kitobiga ko'ra, uning boyligi 1,05 trillion dollarga yetgan edi. Bundan tashqari, aksiyalarni joylashtirish kompaniyaning 4,4 mingdan ortiq xodimiga millioner bo'lish imkonini berdi.
Source: kun.uz