Apple va Microsoft kompaniyalari o‘zlarining eng mashhur mahsulotlari narxini sezilarli darajada oshirishdi. Bunga sabab sifatida sun’iy intellekt (AI) sohasidagi jadal rivojlanish tufayli xotira chiplari narxining keskin ko‘tarilishi ko‘rsatilmoqda.

Apple payshanba kuni Mac va iPad qatoridagi ko‘plab modellar narxini 20 foiz yoki undan ko‘proqqa oshirdi. Masalan, asosiy MacBook Air modeli AQShda 1099 dollardan 1299 dollarga, MacBook Pro esa 1699 dollardan 1999 dollarga ko‘tarildi.

iPad Air narxi 599 dollardan 749 dollarga, iPad Pro esa 999 dollardan 1199 dollarga oshdi. Eng katta o‘sish Mac Studio M3 Ultra kompyuterida kuzatildi – narx 3999 dollardan 5299 dollarga yetdi.

Apple vakilining so‘zlariga ko‘ra, kompaniya iste’molchilarni chip narxining oshishidan himoya qilishga harakat qilgan, ammo endi narxlarni ko‘tarishga majbur bo‘lgan. “AI ma’lumotlar markazlarining tez kengayishi xotira va saqlash qurilmalariga talabni favqulodda oshirdi. Biz hech qachon komponent narxining bunchalik tez va katta miqdorda oshganini ko‘rmagan edik”, dedi u.

Narx oshishidan so‘ng Apple aksiyalari 6 foizdan ko‘proqqa tushib ketdi – bu AQSh prezidenti Donald Trampning o‘tgan yil aprel oyida “ozodlik kuni” tariflarini e’lon qilganidan beri eng katta pasayish bo‘ldi.

Avstraliyalik tahlilchi Trevor Longning fikricha, narx oshishi Apple savdosiga salbiy ta’sir ko‘rsatadi. “Ba’zi mahsulotlar, masalan, MacBook Neo, ajoyib mahsulot bo‘lish bilan birga, narxi bilan ham ajralib turardi. Endi bu afzallik yo‘qoldi”, dedi u.

Microsoft ham chip narxining oshishini sabab qilib, Xbox o‘yin konsolining 512 GB va 1 TB modellari narxini mos ravishda 100 va 150 dollarga oshirishini e’lon qildi. Kompaniya konsol xotirasi va saqlash qurilmalari narxi 2,5 baravardan ko‘proqqa oshganini va 2027 yil kuziga kelib yana ikki baravar oshishi kutilayotganini ta’kidladi.

Source: www.aljazeera.com