Amerika Qo'shma Shtatlari prezidenti Donald Tramp Eronga qarshi rejalashtirilgan keng ko'lamli harbiy hujumni bekor qilganini ma'lum qildi. Uning so'zlariga ko'ra, tomonlar o'rtasida kelishuvning asosiy shartlari bo'yicha dastlabki bitimga erishilgan.

Tramp o'zining Truth Social platformasida shanba kuni kechqurun bu qarorni e'lon qildi. Avvalroq Amerika ommaviy axborot vositalari Vashington va Isroil Eronning energetika infratuzilmasiga zarba berishga tayyorlanayotgani haqida xabar tarqatgan edi.

Uning ta'kidlashicha, bu qaror Eron va boshqa Yaqin Sharq davlatlarining iltimosiga binoan qabul qilingan. Ular Trampdan hujumni to'xtatishni va kelishuv imkoniyatini berishni so'rashgan. Tramp kelishuv tezda yakunlanishi sharti bilan bunga rozi bo'lgan.

Trampning qo'shimcha qilishicha, kelishuv Hormuz bo'g'ozining darhol, to'liq va butunlay ochilishini ta'minlaydi hamda Eronning yadroviy tahdidiga barham beradi. Biroq Tehron rasmiylari bu haqda hozircha hech qanday izoh bermagan.

Shanba kuni ertaroq Eron tashqi ishlar vaziri Abbos Aroqchi Saudiya Arabistoni hamkasbiga AQSh yoki Isroil tomonidan har qanday hujumga mutanosib javob berilishini aytgan edi. Axios nashri xabariga ko'ra, Saudiya valiahd shahzodasi Muhammad bin Salmon Trampga qo'ng'iroq qilib, hujumni bekor qilish va muzokaralarga qaytishni so'ragan.

Ayni paytda AQSh Davlat departamenti mintaqadagi 10 davlatda yashovchi amerikaliklar uchun xavfsizlik ogohlantirishlari e'lon qildi. Ularga yuqori darajadagi ehtiyot choralarini ko'rish va keskinlashayotgan vaziyat tufayli mintaqani tark etishni o'ylab ko'rish tavsiya qilindi.

Source: www.aljazeera.com