Nigeriyaning shimolidagi Kano shtati hukumati tomonidan tashkil etilgan ommaviy to‘y marosimida 1500 ga yaqin juftlik bir vaqtda nikohdan o‘tdi. Ikki kun davom etgan tadbir past daromadli oilalarni qo‘llab-quvvatlash va ijtimoiy barqarorlikni ta’minlash maqsadida o‘tkazildi.

Gubernator Abba Kabir Yusuf rahbarligidagi viloyat hukumati har bir kelinni 200 ming nayro (taxminan 147 dollar) miqdorida mahr va kichik biznes boshlash uchun yordam bilan ta’minladi. Shuningdek, juftliklarga karavot, matras va adyol kabi uy-ro‘zg‘or buyumlari ham topshirildi.

To‘yda qatnashgan kuyovlardan biri Abubakar Aliyu Musa Associated Press agentligiga bergan intervyusida: “Butun to‘y g‘oyasi biz kabi moliyaviy jihatdan barqaror bo‘lmagan oilalarga yordam berishdir. Shuning uchun hukumat bizga turmush qurishda yordam bermoqda”, dedi.

Gubernator Yusuf bu dasturni “Kano shtatida umidni tiklash va munosib oilaviy hayotni qo‘llab-quvvatlashga qaratilgan jasur ijtimoiy aralashuv” deb ta’rifladi. Uning so‘zlariga ko‘ra, dastur nafaqat turmush qurishga qiynalayotgan ayollarga yordam berish, balki oilalarni mustahkamlash va ijtimoiy barqarorlikni oshirishga qaratilgan.

Marosimda zo‘ravonlik hujumlarida yaqinlarini yo‘qotgan odamlar ham ishtirok etdi. Xususan, Xaruna Bashir ismli kishi yil boshida xotini va olti farzandini hujumda yo‘qotgan edi. Uning aytishicha, bu to‘y unga asta-sekin normal hayotga qaytish imkonini berdi.

Nigeriya uzoq yillardan beri xavfsizlik inqirozi bilan kurashmoqda, ayniqsa mamlakat shimolida islomiy isyonchilar va uyushgan to‘dalar tez-tez hujumlar uyushtiradi. Ko‘plab qurolli guruhlar maktab o‘quvchilarini katta to‘lov evaziga o‘g‘irlab ketishadi. Chorshanba kuni Nigeriya hukumati 308 kishining ozod etilganini e’lon qildi.

Source: www.dw.com