12-avgust kuni AQSh Adliya vazirligi 11 kishiga nisbatan ayblov e'lon qildi. Ularga 10 yil davomida, asosan, Xitoy fuqarolariga AQShda qonuniy yashash huquqini olish uchun yordam berish maqsadida 1000 ga yaqin soxta nikoh tashkil qilganlikda gumon qilinmoqda. Bu haqda Reuters axborot agentligi xabar berdi.

Manhettendagi federal sudda e'lon qilingan ayblov xulosasiga ko'ra, xorijiy fuqarolar AQSh fuqarosi bilan turmush qurish va qonuniy yashash huquqini qo'lga kiritish uchun olti kishidan iborat "vositachilar" guruhiga har biri 100 000 dollargacha pul to'lagan. Ayblov xulosasida, shuningdek, AQSh fuqarolariga bunday soxta nikohga rozi bo'lishlari uchun 30 000 dollargacha haq to'langanligi ta'kidlangan.

Sxema ishtirokchilari xitoylik fuqarolarga qonuniy doimiy yashovchi maqomini olishlari uchun yangi turmush qurganlar nomidan AQSh Ichki xavfsizlik vazirligiga hujjatlarni topshirishda ham yordam bergan. Bu jarayon orqali ular immigratsiya tizimini aldab, qonuniy maqom olishga erishgan.

Bosh prokuror Todd Blansh mazkur sxemani "AQSh tarixidagi nikoh bilan bog'liq firibgarlik bo'yicha eng yirik jinoiy ishlardan biri" deb ta'rifladi. Uning so'zlariga ko'ra, bu holat "odamlar immigratsiya tizimini aldash uchun nimalarga qodir ekanini" ko'rsatib qo'ygan.

Bu voqea o'tgan hafta prezident Donald Tramp tomonidan "tug'uruq turizmi"ni cheklashga qaratilgan farmoyish imzolangandan keyin sodir bo'ldi. Bu Trampning tug'ilish huquqi bo'yicha fuqarolikni cheklashga bo'lgan ikkinchi urinishidir. 30-iyun kuni AQSh Oliy sudi Tramp tomonidan inauguratsiya kuni imzolangan, AQSh fuqarosi bo'lmaganlardan tug'ilgan shaxslarni avtomatik fuqarolikdan mahrum qiluvchi farmonni rad etgandi.

Davlat departamenti AQShga faqatgina o'z farzandiga fuqarolik olib berish maqsadida kelayotgan ayollarga qarshi kurashish uchun viza egalarining harakatlarini nazoratdan o'tkazish ishlarini boshlaganini ma'lum qildi.

Source: www.gazeta.uz