Hindistonning shimoliy Uttarakhand shtatida qurilayotgan tunnelda sodir bo‘lgan halokat oqibatida kamida yetti nafar ishchi halok bo‘ldi. Mahalliy rasmiylarning ma’lum qilishicha, yana uch kishi qidirilmoqda.

Hodisa kechasi Chamoli tumanidagi Pipalkoti shahridagi Tehri Hydro Development Corporation Limited (THDC) kompaniyasiga tegishli tunnelda sodir bo‘lgan. Ko‘chki natijasida tunnelga suv va qoldiqlar oqib kirgan.

Rasmiylarga ko‘ra, halokat vaqtida tunnel ichida 22 ishchi bo‘lgan. Yaradorlar davolanmoqda, ularning holati barqaror.

Hozirda uch ishchini qutqarish bo‘yicha ko‘p tarmoqli operatsiya davom etmoqda. Milliy va shtat favqulodda vaziyatlar xizmatlari, Hindiston-Tibet chegara politsiyasi va o‘t o‘chirish bo‘linmalari joyiga jalb qilingan.

Qutqaruvchilar suv va qoldiqlar bilan kurashmoqda, chunki mintaqada so‘nggi kunlarda kuchli yomg‘ir yog‘moqda. Mahalliy hukumat tarqatgan tasvirlarda qutqaruvchilar tunnelning suv bosgan qismiga yetib borish uchun bosh chiroqlari va vaqtinchalik sallar yordamida harakatlanayotgani ko‘rinadi.

Uttarakhand bosh vaziri Pushkar Singx Dhami juma kuni ertalab halokat joyiga tashrif buyurib, qutqaruv ishlarini ko‘zdan kechirdi. "Har bir ishchini xavfsiz evakuatsiya qilish bizning eng ustuvor vazifamiz", — dedi Dhami.

Eslatib o‘tamiz, 2023-yilda ham Uttarakhandda tunnel qulashi oqibatida 41 ishchi 17 kun davomida yer ostida qolib, keyin qutqarilgan edi.

Source: www.dw.com