Isroil harbiy kuchlari G‘azo shahri markazidagi politsiya shtab-kvartirasi va Nusayrat qochqinlar lageriga qilgan hujumlarda kamida 10 falastinlik halok bo‘ldi. Mahalliy tibbiy manbalarga ko‘ra, G‘azo shahridagi hujumda 9 kishi, jumladan, yangi tayinlangan politsiya boshlig‘i va ayollar politsiyasi direktori ham halok bo‘ldi.

Al-Jazira muxbiri Hani Mahmudning xabar berishicha, portlash bolalar bilan gavjum bog‘ yaqinida sodir bo‘lgan. Hujumda yana 15 kishi yaralangan. Nusayrat lageridagi hujumda esa yana bir falastinlik halok bo‘ldi.

Isroil armiyasi havo kuchlari Nusayratda ikkita Hamas qo‘mondonini va G‘azo shahrining Tuffah hududida yana bir qo‘mondonni nishonga olganini da’vo qilmoqda. Biroq ularning Hamas bilan aloqasini tasdiqlovchi hech qanday dalil keltirilmagan.

Hamas Isroilning “qarshilik yetakchilarini” nishonga olish haqidagi bayonotini “asossiz va yolg‘on” deb atadi. Tashkilot Isroil hukumatini tinch aholini va politsiyani ataylab nishonga olishda aybladi hamda bu “G‘azo sektorida xalqimizga qarshi qirg‘in urushini qayta yoqishga” urinish deb hisoblaydi.

Seshanba kuni Isroil hujumlari G‘azo bandargohidagi kafeda 7 kishini, jumladan, bir bolani o‘ldirgan edi. Bu joy ko‘chirilganlar lageriga aylantirilgan. Isroil harbiylari yana hech qanday dalilsiz Hamas qo‘mondonlarini nishonga olganini da’vo qilmoqda.

Hujumlar AQSh prezidenti Donald Trampning kuyovi va Yaqin Sharq bo‘yicha elchisi Jared Kushner mintaqaga tashrif buyurganidan ikki kun o‘tib sodir bo‘ldi. Kushner Isroil Bosh vaziri Binyamin Netanyaxu bilan uchrashuvda G‘azodan chiqish bo‘yicha kelishuvni ilgari surdi, biroq Netanyaxu Hamas qurolsizlanishi evaziga Isroil qo‘shinlarini olib chiqishdan bosh tortdi.

Uchrashuvdan so‘ng Kushner “Isroilning o‘zini himoya qilish huquqini” yana bir bor ta’kidladi va agar Hamas qurolsizlanmasa, AQSh Isroilni “ishni munosib tarzda tugatishini” qo‘llab-quvvatlashini aytdi.

Source: www.aljazeera.com