Nepal va Xitoy chegarasidagi halokatli suv toshqini va ko‘chkilar oqibatida qurbonlar soni keskin oshmoqda. Nepal rasmiylarining ma’lumotiga ko‘ra, halok bo‘lganlar soni 538 nafarga yetdi, avvalgi kunlarda bu ko‘rsatkich 390 edi. Xitoy Tibetdagi qurbonlar sonini 3 tadan 5 taga yangiladi.

Xalqaro Qizil Xoch qo‘mitasi 93 mingdan ortiq odam ushbu falokatdan bevosita jabr ko‘rganini va shoshilinch gumanitar yordamga muhtojligini ma’lum qildi. Qutqaruv ishlari vaqtincha to‘xtatilgan edi, chunki ko‘chki natijasida hosil bo‘lgan ko‘l to‘lib, qo‘shimcha suv toshqini xavfini tug‘dirdi.

Rasuwa tumani ma’muri Narendra Pariyarning so‘zlariga ko‘ra, ko‘l qirg‘oqlarini yorib o‘tgani haqida xabar olingan va daryoda suv sathi ko‘tarilmoqda. Aholi tepaliklarga qochishga majbur bo‘ldi, biroq keyinchalik xavf kamaygani aytilgan bo‘lsa-da, vaziyat kuzatuv ostida.

Hozirgacha 1400 dan ortiq kishi, jumladan 30 dan ortiq davlatdan 517 nafar chet el fuqarolari bedarak yo‘qolgan. Janubiy Koreya, Hindiston, Xitoy, AQSh, Buyuk Britaniya, Yaponiya va boshqa davlatlar yordam taklif qilgan, biroq Nepal hozircha xorijiy qutqaruv guruhlarini qabul qilishga tayyor emas.

Birlashgan Millatlar Tashkilotining Tabiiy ofatlar xavfini kamaytirish bo‘yicha idorasi rahbari Kamol Kishor ogohlantirdi: “Falokat hali to‘liq tugamagan, u qandaydir ma’noda davom etmoqda”. Jahon sog‘liqni saqlash tashkiloti esa suv toshqinidan keyin yuqumli kasalliklar tarqalishi xavfi borligini ta’kidladi.

Xitoy suv resurslari vazirligi ko‘lda 2 million kub metr suv to‘planganini, keyingi uch kunda yana 3 million kub metr suv kelishi kutilayotganini ma’lum qildi. Muhandislar to‘g‘onning pastki qismidan drenaj kanali qazishni rejalashtirmoqda, ammo bu ishlar murakkab relyef tufayli qiyin kechmoqda.

Source: www.dw.com