Tailand hukumati 2024-yil yozidan beri amalda bo‘lgan chet ellik sayohatchilar uchun 60 kunlik vizasiz rejimni bekor qilishni e’lon qildi. 15-sentabrdan boshlab tegishli davlatlar fuqarolari uchun vizasiz qolish muddati 30 kungacha qisqartiriladi.

Ichki ishlar vazirligining rasmiy xabarnomasi hukumatnoma Royal Gazette’da e’lon qilindi. Hujjatda ta’kidlanishicha, qaror migratsiya qoidalarini hozirgi vaziyatga moslashtirish, milliy xavfsizlikni mustahkamlash va turistik oqimlarni samaraliroq boshqarish maqsadida qabul qilingan.

Yangi qoidalar xabarnoma e’lon qilinganidan 15 kun o‘tib, ya’ni 15-sentabrdan kuchga kiradi. Biroq, ular Tailandning boshqa davlatlar bilan tuzgan ikki tomonlama kelishuvlariga ta’sir qilmaydi – bu davlatlar fuqarolari o‘zaro kelishuvlarda nazarda tutilgan kirish shartlaridan foydalanishda davom etishi mumkin.

Uzoqroq muddatga qolishni istagan sayohatchilar uchun 30 kunga bir martalik uzaytirish imkoniyati saqlanib qoladi. Buning uchun mahalliy immigratsiya idorasiga murojaat qilish kerak.

O‘zgarishlar faqat 15-sentabrdan boshlab Tailandga kiradiganlarga nisbatan qo‘llaniladi. Ushbu sanadan oldin kelgan sayyohlar kirishda berilgan 60 kunlik muddatdan to‘liq foydalanishlari mumkin.

May oyida Tailand hukumati vizasiz qolish muddatini 60 kundan 30 kunga qisqartirish taklifini ma’qullagan edi. Cheklov 90 dan ortiq davlat fuqarolariga taalluqli bo‘lishi kerak edi. O‘shanda Tailand turizm va sport vazirligi rahbari bu qaror chet elliklar tomonidan noqonuniy ishlash, firibgarlik va boshqa huquqbuzarliklar sonining o‘sishi bilan bog‘liqligini aytgan edi.

Source: podrobno.uz