Kamerun futbol federatsiyasi prezidenti Samuel Eto'o Afrika futbol rahbarlarini FIFA prezidenti Gianni Infantinoni qo‘llab-quvvatlashga chaqirdi. Uning so‘zlariga ko‘ra, Infantino Afrika qit’asidagi futbol assotsiatsiyalarining rivojlanishini jadallashtirgan va ko‘plab mamlakatlarga jahon chempionatida ishtirok etish imkoniyatini bergan.
“Prezident Gianni Infantino futbolni o‘zgartirdi”, dedi Eto'o Fransiyaning L’Equipe gazetasiga bergan intervyusida. “Janob Infantino bizning qit’amizga yordam berdi. U federatsiyalarimizning tezroq rivojlanishiga hissa qo‘shdi va buni tan olishimiz kerak. U shu paytgacha erishgan barcha yutuqlari uchun uni qo‘llab-quvvatlashimiz lozim.”
Eto'oning bu fikrlari UEFAning FIFA prezidentiga nisbatan tobora keskinlashib borayotgan pozitsiyasidan keskin farq qiladi. Bu Afrika va Yevropa futbol rahbarlarining ustuvor yo‘nalishlari har xilligini ko‘rsatadi. “U hech qachon jahon chempionati kabi eng buyuk turnirda ishtirok etish imkoniyatiga ega bo‘lmagan davlatlarga imkoniyat yaratdi”, dedi sobiq Kamerun hujumchisi.
Infantino 2027-yil 18-martda bo‘lib o‘tadigan FIFA Kongressida qayta saylanishga nomzodini qo‘yishini ma’lum qilgan. Bu yozda Kanada, Meksika va AQShda bo‘lib o‘tadigan 48 jamoa ishtirokidagi jahon chempionatida Afrika qit’asidan 9 ta to‘g‘ridan-to‘g‘ri yo‘llanma berilgan, 2022-yilda Qatarda bo‘lib o‘tgan turnirda esa bu ko‘rsatkich 5 ta edi.
UEFA erkaklar va ayollar o‘rtasidagi jahon chempionatlari hamda klublar o‘rtasidagi jahon chempionati bilan bog‘liq tijoriy huquqlarni tashqi investorlar ishtirokidagi yangi FIFA Forward Enterprise (FFE) sho‘ba korxonasiga o‘tkazish taklifiga qarshi chiqqan edi. FIFA bu loyiha butunlay bekor qilinganini ma’lum qilgan bo‘lsa-da, Yevropa futbol boshqaruv organi bu masalani hal qilishda davom etmoqda va AQSh sudidan Infantino hamda boshqa FIFA rasmiylari va maslahatchilariga nisbatan Shveytsariyada potentsial jinoiy ish qo‘zg‘atish uchun dalillar olishga ruxsat so‘ramoqda.
Eto'o esa Afrika federatsiyalari FIFA siyosatiga boy futbol davlatlari kabi qaray olmasligini ta’kidladi, chunki ular ko‘p jihatdan davlat moliyasiga tayanadi. “Ba’zi federatsiyalarning byudjeti 150 ming yevroni tashkil qilganida, ular qanday qilib yirik davlatlar bilan raqobatlasha oladi? Biz hech qachon yirik davlatlar kabi narsalarni bir xil idrok eta olmaymiz”, dedi u.
Eto'o resurslar yetishmasligi Afrika davlatlarining iqtidorli futbolchilarni Yevropaga yo‘qotishiga ham sabab bo‘layotganini qo‘shimcha qildi. “Agar Kamerunda yiliga 20-40 million dollar byudjetga tayanish imkoniyatimiz bo‘lganda edi, albatta, bizda [Kilian] Mbappe va [Orelen] Shuameni kabi futbolchilar bo‘lardi”, dedi u Kamerun ildizlariga ega bo‘lgan Fransiya terma jamoasi o‘yinchilariga ishora qilib.
“UEFA FIFA uchun muhim konfederatsiya hisoblanadi. U futbolga katta hissa qo‘shadi, lekin uni yagona yoki eng muhim konfederatsiya deb hisoblamaslik kerak”, deya qo‘shimcha qildi u.
Source: www.aljazeera.com