Ispaniyaning Kanar orollari qirg‘oqlarida muhojirlar kemasining halokati oqibatida kamida besh kishining jasadi topildi. Dengiz qutqaruv xizmati ma’lumotlariga ko‘ra, chorshanba kuni kechqurun Gran Kanariya orolidan 120 km janubda suzib ketayotgan kema aniqlanib, undan 44 erkak qutqarilgan.

Qutqaruvchilar dastlab noqulay ob-havo tufayli kemada qolgan besh jasadni olib chiqa olmagan. Kema Arginigin portiga yetkazilgach, jasadlar olib chiqilgan. Uch kishi og‘ir ahvolda vertolyotda kasalxonaga yetkazilgan, qolgan 41 kishiga Qizil Xoch yordam ko‘rsatgan.

Qutqarilganlarning barchasi erkaklar bo‘lib, ular Mali va Senegaldan kelgan. Ularning ba’zilari voyaga yetmaganlar. Biroq, Ispaniyaning Caminando Fronteras migrantlarga yordam tashkiloti ma’lum qilishicha, Gambiyadan 27 kun oldin yo‘lga chiqqan kemada jami 83 kishi halok bo‘lgan, jumladan uch ayol va bir go‘dak qiz.

Tashkilot ma’lumotlari migrantlar oilalari va rasmiy statistika asosida shakllantiriladi. Dengiz qutqaruv xizmati esa boshqa qurbonlar topilmaganini va bu raqamlarni tasdiqlay olmasligini bildirgan. Qidiruv ishlari davom ettirilishi noaniq.

Kanar orollari rahbari Fernando Klavixo bu fojiani “Atlantika okeani halokat tuzog‘iga aylanganini” ta’kidlab, migratsiya bo‘yicha davlat siyosati zarurligini aytgan. Uning so‘zlariga ko‘ra, bunday yo‘qotishlar davom etishi chidab bo‘lmas holat.

Kanar orollari Afrikadan Yevropaga kirishning asosiy yo‘llaridan biri bo‘lib, har yili minglab muhojirlar xavfli yo‘lda halok bo‘ladi. 2024-yilda rekord darajadagi 46 ming kishi orollarga yetib kelgan bo‘lsa, joriy yilning sakkiz oyida bu ko‘rsatkich 57 foizga kamaygan.

Source: www.aljazeera.com