Oq uy o‘z veb-saytida beshta arkada uslubidagi o‘yinlarni taqdim etdi. Ularning har biri AQSh prezidenti Donald Tramp kun tartibidagi turli siyosatlarni targ‘ib qilishi taxmin qilinmoqda. Bu esa jamoatchilikning keskin noroziligiga sabab bo‘ldi.

Tanqidchilarning ta'kidlashicha, ma'muriyat o‘yin-kulugini xalqning og‘ir iqtisodiy ahvoli va Eronga qarshi urush davom etayotgan bir paytda birinchi o‘ringa qo‘ygan. O‘yinlar orasida “Devor qurish”, “Rio Run”, “Ta'minot liniyasi”, “Flappy Bill” va “Tramp jamg‘armasi magnati” kabi nomlar bor.

Senator Mett Lesser X’da shunday yozdi: “Isitish moyi narxi rekord darajada yuqori, ammo siz chegara bo‘yicha amaldor Tom Xoman bilan video o‘yinda o‘ynashingiz mumkin”. Huquq himoyachilari ham bu tashabbusni qattiq qoraladi.

Texas shtatidagi Frontera Federatsiyasi hamraisi Amerika Garsiya Grevalning so‘zlariga ko‘ra, bu “odamlarning hayoti bilan o‘yin qilish”ning davomi. Uning qo‘shimcha qilishicha, o‘yin dizaynerlari “inson bo‘lish va boshqalarga g‘amxo‘rlik qilish nimani anglatishini unutgan”.

Chegarada ishlaydigan AMIGOS San Diego hamjamiyati dasturi koordinatori Adriana Xasso ma'muriyatning jiddiy emasligini ta'kidladi. Uning fikricha, bu “shafqatsizlik va ekstremizm”ning yana bir namoyishi.

So‘nggi oylarda Tramp Eronga qarshi urushning iqtisodiy oqibatlari va ichki siyosati tufayli tobora kuchayib borayotgan tanqidlarga duch kelmoqda. Mojaro Hormuz bo‘g‘ozini deyarli olti oy davomida yopib qo‘ygan, bu esa neft, tabiiy gaz va o‘g‘it yetkazib berishni izdan chiqargan hamda AQSh inflyatsiyasini Federal rezervning 2 foizlik maqsadidan yuqoriga surgan.

Tramp, shuningdek, Oliy sud qisman bekor qilgan tarif siyosati, oziq-ovqat yordami dasturlarining qisqartirilishi va “Arzon sog‘liqni saqlash to‘g‘risida”gi qonun soliq imtiyozlarining tugatilishi tufayli ham tanqid qilinmoqda. Iqtisodchilarning fikricha, bularning barchasi uy xo‘jaliklari byudjetiga bosimni oshirmoqda.

Oq uy esa bunga befarq qarab, X’da “YUTISHNI TO‘XTATIB BO‘LMAYDI” deb yozib, o‘yinlarga havola joyladi.

Source: www.aljazeera.com