Yakshanba kuni Mayamida (Florida shtati) halokatga uchragan Amazon yuk samolyoti bortidagi uchuvchi qo'nish chog'ida tezlik haddan tashqari yuqori bo'lganini bir necha bor ogohlantirgan, ammo ikkinchi uchuvchidan izchil javob olmagan. Bu haqda AQSh Milliy transport xavfsizligi kengashi (NTSB) tarqatgan yangi parvoz ma'lumotlarida qayd etilgan.
NTSB ma'lumotlariga ko'ra, Boeing 767-300 samolyoti uchish-qo'nish yo'lagiga 158 tugun (soatiga 292 km) tezlikda yaqinlashgan. Mutaxassislarning ta'kidlashicha, bu ko'rsatkich yuqori chegarada bo'lgan. Kokpitdagi suhbat yozuvida bir uchuvchi ikkinchisini "samolyotning haddan tashqari tezligi" haqida bir necha marta ogohlantirgan, biroq "izchil og'zaki javob bo'lmagan". Shu bilan birga, balandlik haqida signal ham chalingan.
Tergov davomida parvozning so'nggi daqiqalarida avtomatik "sink rate sink rate" (pasayish tezligi) va "too low terrain" (yer juda past) degan ovozli ogohlantirishlar ham qayd etilgan. Bu signallar samolyotning qo'nishga to'liq tayyor bo'lmagan holda yerga juda yaqin uchayotganini ko'rsatadi. NTSB ma'lumotlarida qanotlardagi flaplarning kech ochilgani ham qayd etilgan. Aviatsiya advokati Pablo Roxasning CBS News'ga aytishicha, bu "qo'nishning halokatli bo'lishini tasdiqlaydi".
Samolyot uchish-qo'nish yo'lagidan chiqib ketib, yerdagi texnikaga, oq Ford mikroavtobusiga, so'ngra to'siqga urilgan. Keyin Toyota Corolla bilan to'qnashib, yo'lakdan taxminan 1300 fut (394 metr) narida to'xtagan. Halokat oqibatida 5 kishi halok bo'lgan, yana 5 kishi jarohatlangan. Halok bo'lganlar mikroavtobusdagi samolyot tozalash ekipaji a'zolari bo'lib, ularning ismlari ma'lum qilindi: Rolando Aleman Leon (55), Yoel Rodriguez Naranjo (53), Julio C Pineda (75), Carlos Acosta Fajardo (53) va Javierkys Reyes Quevedo (47).
NTSB tergovni davom ettirmoqda. AQSh hukumati aviatsiya xavfsizligi bo'yicha so'nggi yillarda bir qator choralar ko'rgan bo'lsa-da, ushbu halokat yuk aviatsiyasida xavfsizlik qoidalariga rioya qilish masalasini yana bir bor kun tartibiga qo'ydi.
Source: www.bbc.co.uk