Nigeriyada noqonuniy kon qazishda hibsga olingan 37 nafar mahbusning o‘limi yuzasidan tergov boshlandi. Rasmiylar o‘lim sababini kasallik avj olishi bilan bog‘lashmoqda, biroq AFP axborot agentligining ma’lumotlariga ko‘ra, razvedka hisobotida Niger shtatining shimoli-sharqidagi Nigeria Security and Civil Defence Corps (NSCDC) hibsxonasidagi odamlar sonining haddan tashqari ko‘pligi va yomon ventilyatsiya sabab bo‘lishi mumkinligi aytilgan.

NSCDCning Niger shtatidagi rahbari Suberu Siyaka Aniviye bayonotida gumonlanuvchilar seshanba va chorshanba kunlari noqonuniy kon qazishga qarshi operatsiya chog‘ida hibsga olinganini ma’lum qildi. Mintaqa kichik hajmdagi oltin qazib olish bilan mashhur. Aniviyening so‘zlariga ko‘ra, rasmiylar o‘lim sababi kasallik bo‘lishi mumkin deb hisoblamoqda va jasadlar “o‘limning asl sababini aniqlash uchun qo‘shimcha tibbiy ekspertizaga” yuborilgan. U qanday kasallik nazarda tutilganini aytmadi.

Omon qolgan Dauda Shehu Associated Press agentligiga aytishicha, 65 nafar mahbus yomon ventilyatsiya qilingan kameraga tiqilib, ular bo‘g‘ilib qolgan bo‘lishi mumkin. “Biz tiqilib qolgan edik va nafas olish uchun ventilyatsiya yo‘q edi”, dedi Shehu. “To‘satdan nafas ololmay qolganimizni angladik va toza havo olish uchun tirishib harakat qila boshladik”. Shehu jasadlar ekspertiza uchun yuborilgan Minna umumiy kasalxonasida gapirar ekan, mahbuslar kamera eshigini taqillatib, xavfsizlik xizmati qo‘riqchilarining e’tiborini jalb qilishga urinishganini aytdi.

Tergovchilar qurbonlarning qarindoshlarini yordam berishi mumkin bo‘lgan har qanday ma’lumot bilan murojaat qilishga chaqirdi. Niger shtati gubernatori Farmer Mohammed Umaru Bago uch kunlik motam e’lon qilib, o‘limlarni “achinarli va fojiali” deb atadi. Payshanba kuni kechqurun norozilik namoyishlari boshlangan, politsiya ko‘zdan yosh oqizuvchi gaz qo‘llagan. Mahalliy nashrlar NSCDC qo‘mondoni Aniviye lavozimidan chetlashtirilganini xabar qildi.

Source: www.aljazeera.com