Birlashgan Millatlar Tashkiloti ma'lumotlariga ko'ra, Yamanning g'arbiy qirg'oqlari va Taiz hamda Lahj viloyatlarida janglar kuchayishi natijasida 112 mingdan ortiq kishi o'z uylarini tark etishga majbur bo'ldi. Yana 3 mingga yaqin kishi qo'shni Jibuti davlatiga qochib o'tdi. Bu haqda Xalqaro migratsiya tashkilotining (XMT) Yaman bo'yicha missiyasi rahbari Abdusattor Esoev jurnalistlarga ma'lum qildi.
Esoevning so'zlariga ko'ra, ko'chirilganlarning aksariyati so'nggi ikki hafta ichida, asosan, g'arbiy qirg'oq bo'ylab va Taiz hamda Lahj viloyatlarida uy-joylarini tashlab ketgan. Uning ta'kidlashicha, tashkilotning resurslari juda cheklangan va zaxiralar tez orada tugaydi. XMT rahbarining hisob-kitoblariga ko'ra, 22 million yamanlik, ya'ni mamlakat aholisining deyarli yarmi shoshilinch insonparvarlik yordamiga muhtoj.
Inqiroz ayniqsa, mamlakatda ro'yxatga olingan 65 mingdan ortiq qochqin va boshpana izlovchilar, asosan Somalidan kelganlar uchun xavfli. BMT Aholishunoslik jamg'armasi (UNFPA) vakili Franchesko Galtierining so'zlariga ko'ra, vaziyat "soat sayin" og'irlashmoqda. Uning ma'lumotlariga ko'ra, ko'chirilganlar orasida 2000 ga yaqin homilador ayol bor va ularning 200 nafari yaqin kunlarda tug'ishi kutilmoqda.
BMT Qochqinlar bo'yicha Oliy komissarligi (UNHCR) ma'lumotlariga ko'ra, 3000 ga yaqin yamanlik qayiqda Jibutiga qochib o'tgan. Bob al-Mandab bo'g'ozining eng qisqa yo'li 25 kilometrdan sal ko'proq. O'tgan hafta davomida 2400 dan ortiq kishi, asosan ayollar, bolalar va keksalar bu yo'lni bosib o'tgan. Bu oqim aholisi bir millionga yaqin bo'lgan Jibuti uchun qo'shimcha bosim yaratmoqda, chunki bu davlat allaqachon 36 mingga yaqin qochqinni qabul qilgan.
Strategik ahamiyatga ega Bob al-Mandab bo'g'ozi Qizil dengizni Aden ko'rfazi bilan bog'laydi. AQShning Eronga qarshi urushi Hurmuz bo'g'ozini to'sib qo'ygani sababli, bu yo'nalish muqobil dengiz yo'nalishiga aylangan. AQSh rejimining bu harakati mintaqadagi vaziyatni yanada murakkablashtirib, Yaman xalqining azob-uqubatlarini kuchaytirmoqda.
Source: www.aljazeera.com