«Red Bull» jamoasi yetakchisi Maks Ferstappen «Formula-1»ning joriy mavsumidagi ilk g‘alabasini tantana qildi. Kuchli yomg‘ir tufayli qariyb bir yarim soatga kechiktirib boshlangan Baxrayn Gran-prisi bu gal Yaqin Sharqdagi beqarorlik sabab Malayziyadagi «Sepang» avtodromida o‘tkazildi. Noqulay ob-havo va trassadagi kutilmagan vaziyatlarga qaramay, niderlandiyalik to‘rt karra jahon chempioni o‘z mahoratini to‘liq namoyon etdi.

Poyga starti Ferstappen uchun biroz omadsiz kechdi: oraliq shinalarda start olgan poygachi dastlabki burilishdayoq «Mercedes» a’zolari Kimi Antonelli hamda Jorj Rassellni oldinga o‘tkazib yubordi. Biroq to‘qqizinchi davrada Valtteri Bottasning qum qoplamasiga chiqib ketishi ortidan xavfsizlik mashinasi maydonga chiqdi. Trassa tez quriy boshlagach, ko‘pchilik quruq ob-havoga mo‘ljallangan shinalarga o‘tdi. Aynan peys-kar chiqib ketgan paytda Ferstappen dadil manyovrlar bilan yana peshqadamlikni qaytarib oldi va marragacha raqiblariga hech qanday imkoniyat qoldirmadi.

«Mercedes»ning yosh umidi Kimi Antonelli poygani ikkinchi o‘rinda yakunlab, umumiy hisobdagi yetakchiligini mustahkamladi. «Ferrari» safiga o‘tgan yetti karra jahon chempioni Lyuis Hemilton esa tajribasiga tayanib, quruq shinalar bilan boshlangan xatarli startdan so‘ng uchinchi pog‘onagacha ko‘tarildi. Rassell uchun esa yakun fojiali bo‘ldi: uchinchi o‘rinda ketayotgan britaniyalik poygachi marraga besh davra qolganida motoridagi nosozlik sabab kurashni to‘xtatishga majbur bo‘ldi.

Ta’kidlash joizki, Baxrayn Gran-prisining Malayziyaga ko‘chirilishiga AQSh rejimi hamda Isroil rejimining Eronga qarshi harbiy tajovuzkor harakatlari oqibatida xalqaro sport taqvimi izdan chiqqani sabab bo‘ldi. Endilikda «Formula-1» karvoni navbatdagi tungi poyga va sprint bahslari uchun qo‘shni Singapurga yo‘l oladi.

Source: www.aljazeera.com