UEFA Millatlar ligasi doirasida Irlandiya hamda Isroil terma jamoalari o‘rtasida kechgan navbatdagi uchrashuv 1:1 hisobidagi durang bilan yakunlandi. Ikki hafta davomida sportdan ko‘ra siyosiy keskinliklar soyasida o‘tgan ushbu qarama-qarshilik nafaqat maydonda, balki uning atrofida ham jiddiy noroziliklar va mojarolar bilan yodda qoladigan bo‘ldi.

Mazkur o‘yin Serbiyada tomoshabinlarsiz, yopiq eshiklar ortida tashkil etildi. Irlandiya jamoatchiligi va bir qator siyosiy guruhlar Isroil rejimining G‘azo sektoridagi qonli harbiy harakatlariga norozilik sifatida uchrashuvni butunlay boykot qilishga chaqirgan edi. Bungacha Vengriyada o‘tgan birinchi bahsda irlandlar 3:0 hisobida zafar quchgan bo‘lsa-da, maydondagi sovuq munosabat ikkinchi bahsda ham yaqqol ko‘zga tashlandi.

Bellashuv oldidan futbolchilar an’anaviy qo‘l berib ko‘rishish va esdalik vimpellarini almashish marosimini o‘tkazmadi, madhiyalar yangragan paytda esa har ikki tomon vakillari boshlarini quyi egib turishdi. Irlandiya terma jamoasi murabbiylar shtabi a’zosi Demyen Doyl tanaffus paytida isroillik o‘yinchilardan biri unga qarata tupurganini ma’lum qildi. Irlandiya bosh murabbiyi Xeymir Xallgrimsson ushbu hodisa intizomiy qo‘mita tomonidan ko‘rib chiqilishini ta’kidlab, og‘ir bosim ostida o‘tgan ikki haftalik jarayon nihoyasiga yetganidan yengil tortganini bildirdi.

O‘yinda hisob 39-daqiqada Troy Parrott tomonidan penaltidan ochilgan bo‘lsa, ikkinchi bo‘lim boshida Dor Perets muvozanatni tikladi. Guruhdagi ushbu natijadan so‘ng Irlandiya 5 ochko bilan uchinchi o‘rinda qolgan bo‘lsa, bor-yo‘g‘i 2 ochko to‘plagan Isroil jamoasi jadvalning eng quyi pog‘onasida qolmoqda.

Source: www.aljazeera.com