Pokistonda qamoqqa olingan sobiq bosh vazir Imron Xonning minglab tarafdorlari uning zudlik bilan ozod etilishini talab qilib, poytaxt Islomobod tomon ommaviy yurishni boshladi. Yakshanba kuni Lakki-Marvat shahridan boshlangan mazkur namoyishda Xon asos solgan "Pokiston adolat harakati" (PTI) partiyasining qizil-yashil bayroqlarini ko‘targan kamida 5 ming kishi qatnashmoqda. Islomobodga 275 kilometr masofadan yo‘l olgan kortej tunda to‘xtab, harakatni yana davom ettirishi belgilangan.
Siyosatchining tarafdorlari va uning oilasi 73 yoshli sobiq yetakchining sog‘lig‘i borasida xavotirlar kuchayib borayotganini ma’lum qilmoqda. Yaqinlarining iddaosiga ko‘ra, qamoqxona ma’muriyati o‘z vaqtida tibbiy yordam ko‘rsatmagani oqibatida Imron Xon o‘ng ko‘zining ko‘rish qobiliyatini sezilarli darajada yo‘qotgan. Sobiq sport yulduzi va bosh vazir 100 dan ortiq jinoyat ishlarida, jumladan, davlat sirlarini oshkor qilish va davlat sovg‘alarini noqonuniy sotishda ayblanib, jami 14 yillik qamoq jazosiga hukm qilingan edi. Xonning o‘zi ushbu ayblovlarni mutlaqo asossiz va siyosiy buyurtma deb hisoblaydi.
Namoyish aslida o‘tgan haftada boshlanishi rejalashtirilgan edi, biroq rasmiylar va muxolifat o‘rtasidagi muzokaralar sabab qoldirilgan. Biroq partiya rahbariyati talab qilgan Imron Xon bilan uchrashuv va unga mustaqil shifokorlar tomonidan yordam ko‘rsatilishi talablari rad etilgach, muloqot boshi berk ko‘chaga kirdi. Hozirda Islomobod ma’muriyati namoyishchilarning shaharga kirishiga to‘sqinlik qilish maqsadida asosiy trassalarga yuk konteynerlarini joylashtirib, yo‘llarni to‘sib qo‘ygan.
Xayber-Paxtunxva viloyati bosh vaziri Suhayl Afridiy marsh yaqin kunlarda poytaxtga yaqinlashishini va butun mamlakat bo‘ylab norozilik to‘lqinini uyg‘otishini ma’lum qildi. O‘z navbatida, Ichki ishlar vazirligi muxolifatni terrorizmga qarshi kurash bo‘yicha majburiyatlarni buzganlikda va muzokaralarni barbod qilganlikda ayblamoqda. Mamlakatda ziddiyat kuchayib borayotgan bir paytda, hatto dunyoga mashhur sobiq kriketchilar ham amaldagi hukumatni Imron Xonga insonparvarlik munosabatida bo‘lishga va zarur muolajalarni ta’minlashga chaqirmoqda.
Source: www.bbc.co.uk