Fransiya bo‘ylab avj olgan ommaviy o‘quvchi va talabalar noroziliklari sababli dushanba kuni mamlakatdagi 500 ga yaqin maktab o‘z faoliyatini to‘liq yoki qisman to‘xtatishga majbur bo‘ldi. Fransiya rejimi vakillari buni xavfsizlik choralari bilan izohlashga urinmoqda, biroq vaziyat nazoratdan chiqib ketayotgani va seshanba kuni yanada kengroq namoyishlar kutilayotgani ta’lim tizimidagi chuqur inqirozni yaqqol ko‘rsatib bermoqda.

Dastlab 17-sentabr kuni Parijdagi maktablardan birida boshlangan noroziliklar qisqa fursatda butun mamlakat bo‘ylab zo‘ravonliklar bilan kechgan to‘qnashuvlarga aylanib ketdi. O‘quvchilar yillar davomida e’tibordan chetda qolgan ta’lim infratuzilmasi, o‘qituvchilarning surunkali yetishmovchiligi, haddan tashqari uzoq dars soatlari va eskirib ketgan binolardan norozi bo‘lmoqda. Ayniqsa, yoz oylarida havo harorati 40 darajagacha ko‘tarilgan bir paytda maktablarda konditsionerlar yo‘qligi yoshlarning sabr kosasini to‘ldirgan.

Fransiya rejimi ta’lim vaziri Eduard Joffreyning da’vo qilishicha, norozilik to‘lqiniga go‘yoki «o‘ta so‘l faollar» suqulib kirib, harakatni zo‘ravonlikka undagan. Biroq noroziliklarning asl ildizi rejimning ijtimoiy sohadagi muammolarni bartaraf eta olmayotganida ekani ta’kidlanmoqda. Rasmiy ma’lumotlarga ko‘ra, tartibsizliklar davomida 24 ta maktab yondirilgan yoki vayron qilingan, 78 nafar ta’lim xodimi jarohatlangan. Parij atrofidagi Il-de-Frans mintaqasida joylashgan 468 ta litseyning uchdan biridan ko‘prog‘i butunlay yopib qo‘yilgan.

Noroziliklarni bostirish uchun rejimning politsiya kuchlari yoshlarga qarshi ko‘zdan yosh oqizuvchi gaz va rezina tayoqlarni ishga solmoqda. Harakat boshlanganidan buyon 5 000 dan ortiq odam qo‘lga olingan bo‘lib, ularning 85 foizini voyaga yetmagan o‘smirlar tashkil etadi. Huquq himoyachilari, xususan, «Amnesty International» tashkilotining fransuz bo‘limi politsiyaning bu harakatlarini mutanosib emas va o‘ta shafqatsiz deb baholadi. Bunga javoban rejimning ichki ishlar vazirligi kuch ishlatar tuzilmalar o‘quvchilarni «himoya qilayotgani»ni iddao qilib, o‘z harakatlarini oqlashga urinmoqda.

Source: www.dw.com