Efiopiya Bosh vaziri Abiy Ahmad mamlakat shimolidagi qurolli to‘qnashuvlar keng ko‘lamli mintaqaviy urushga aylanib ketish xavfi mavjudligiga qaramay, dengizga chiqish yo‘li bo‘lmagan o‘z davlati Qizil dengizga bevosita yo‘lakka ega bo‘lishi shartligini qat’iy ta’kidladi. Ushbu bayonot u dushanba kuni navbatdagi besh yillik muddatga qasamyod qabul qilgan marosimda yangradi.

Abiy Ahmad parlament minbaridan so‘zlagan nutqida Qizil dengiz portiga ega bo‘lish Efiopiya taraqqiyoti va “sivilizatsiyasi” uchun o‘ta muhim ahamiyatga ega ekanligini ta’kidladi. “O‘zaro manfaat va kelishuv tamoyiliga tayangan holda, biz Efiopiyaning dengizga chiqishini ta’minlash yo‘lida astoydil harakat qilamiz”, — deya qayd etdi hukumat rahbari.

Bosh vazirning ushbu da’vosi Efiopiya armiyasi shimoldagi Tigray viloyatida muxolif kuchlarni siqib chiqarayotgan va qo‘shni davlatlar bilan munosabatlar keskinlashgan bir pallada yangramoqda. 1993-yilda Eritreya mustaqillikka erishgach, Addis-Abeba dengiz portlaridan uzilib qolgan edi. Bugungi kunda Efiopiya hukumati Eritreya, Misr va Sudanni Tigray viloyatidagi isyonchi guruhlarni qo‘llab-quvvatlashda ayblamoqda.

Mintaqada keskinlik avj olar ekan, Qizil dengiz sohilidagi to‘rtta davlat — Misr, Eritreya, Sudan va Somali Misrning Yangi Alamayn shahrida uchrashuv o‘tkazib, dengiz ustidan nazorat faqat unga chegaradosh mamlakatlar huquqi ekanini bildirdi. Bunga javoban Efiopiya Tashqi ishlar vazirligi Qizil dengiz masalasidagi har qanday muzokaralarda Efiopiyaning qonuniy manfaatlari va tarixiy aloqalari inobatga olinishi shartligini ma’lum qildi.

Source: www.aljazeera.com