️ Falastin rasmiylarining tarqatgan ma'lumotlariga ko‘ra, ishg‘ol ostidagi G‘arbiy Sohilning shimoliy qismida sodir bo‘lgan navbatdagi fojiali to‘qnashuvlar oqibatida bir nafar falastinlik halok bo‘ldi, yana 16 kishi turli tan jarohatlari oldi. Ushbu zo‘ravonliklar Isroil rejimining harbiylari himoyasi ostida harakat qilgan ko‘chmanchilar tomonidan amalga oshirilgani iddao qilinmoqda.

️ Falastin Sog‘liqni saqlash vazirligining ma'lum qilishicha, Nablusdan shimoli-g‘arbda joylashgan Burqa qishlog‘idan bo‘lgan 44 yoshli Ali Hasan Yasser al-Bazzari qishloq yaqinidagi yerlarda zaytun yig‘ib yurgan tinch aholiga qilingan hujum chog‘ida o‘ldirilgan. Wafa axborot agentligi mahalliy manbalarga tayanib tarqatgan xabarga ko‘ra, og‘ir jarohat olganlar, jumladan, bir nafar ayol Tulkarim va Nablus shaharlaridagi shifoxonalarga yetkazilgan.

️ Falastin Qizil Yarim oy jamiyati (PRCS) qutqaruvchilari voqea joyida besh nafar jabrlanuvchiga tibbiy yordam ko‘rsatganini ma'lum qildi. Ulardan ikki nafari o‘qotar quroldan jarohat olgan bo‘lsa, qolgan uch nafari shafqatsizlarcha kaltaklangan. Shuningdek, Qizil Yarim oy vakillarining so‘zlariga ko‘ra, Isroil rejimi harbiylari jarohatlanganlarga yordamga kelgan tez yordam brigadalariga ham hujum qilgan va uch nafar feldsher hamda bir ko‘ngillini vaqtincha hibsga olgan.

️ Ramallohdan axborot berayotgan Al Jazeera muxbiri Nida Ibrohimning aytishicha, bu kabi zo‘ravonliklar an'anaviy zaytun yig‘im-terimi mavsumida keskin tus olgan va falastinliklar uchun o‘z yeriga borishning o‘zi hayotiy xavf tug‘dirmoqda. Uning ta'kidlashicha, joriy yilda G‘arbiy Sohilda kamida 45 ming tup zaytun daraxti yo‘q qilib yuborilgan bo‘lib, bu mahalliy aholining iqtisodiy va ijtimoiy hayotiga jiddiy zarba bermoqda.

Source: www.aljazeera.com