Qo'shma Shtatlar va uning ittifoqchilari tomonidan Eron portlariga nisbatan o'rnatilgan dengiz blokadasi hamda uglevodorod eksportiga qarshi joriy etilgan cheklovlar fonida, Tehron hukumati yana bir jiddiy moliyaviy muammoga duch keldi. Rasmiy ma'lumotlarga ko'ra, oldingi neft savdosidan tushishi kerak bo'lgan milliardlab dollarlik daromadlar izsiz g'oyib bo'lgan yoki davlat xazinasiga yetib bormagan. Bu holat mamlakat iqtisodiyotiga qo'shimcha og'irlik yuklamoqda.

Eron sud hokimiyati vakilining ma'lum qilishicha, "ishonchli vakillar" deb nomlanuvchi neft vositachilari tarmog'i hukumatga 10 milliard yevrodan 11 milliard yevrogacha mablag' qarzdor. Ushbu ulkan summa joriy moliyaviy yil uchun rejalashtirilgan davlat neft daromadlarining naq yarmini tashkil etadi. Bunday moliyaviy yo'qotishlar Eron hukumati uchun jiddiy bosh og'rig'iga aylanib, byudjet ijrosini qiyinlashtirmoqda.

Vashingtondagi AQSh rejimi rasmiylari, jumladan g'zina kotibi Skott Bessentning iddao qilishicha, Eronning o'z neft daromadlariga erisha olmasligi Amerika iqtisodiy bosim kampaniyasining samaradorligini ko'rsatarmish. Bessentning so'zlariga ko'ra, Eronning soyali bank tizimi bosim ostida qulamoqda. Ushbu tazyiqlar fevral oyining oxirida boshlangan ziddiyat sharoitida Tehronni taslim etishga qaratilgan harakatlarning bir qismidir.

Ushbu moliyaviy inqiroz Eron hukumati 2012 yilda chet el sanksiyalarini chetlab o'tish uchun qo'llay boshlagan murakkab mexanizmga borib taqaladi. O'shanda rasmiylar neftni rasmiy davlat kanallari orqali sota olmagach, xom ashyoni mahalliy xaridorlar va turli tashkilotlarga topshirishga majbur bo'lgan edi. Oqibatda yuzaga kelgan vositachilar tarmog'i vaqti-vaqti bilan yirik korrupsiya mojarolari va daromadlarning davlat xazinasiga o'z vaqtida tushmasligiga sabab bo'lib kelmoqda.

Source: www.aljazeera.com