«Manchester Siti» ustozi Entso Mareskaning fikricha, ingliz yarim himoyachisi Fil Foden uzoq davom etgan inqiroz davrini ortda qoldirmoqda. 26 yoshli futbolchi Chempionlar ligasi doirasida Gretsiyaning «AEK Afina» klubiga qarshi kechgan uchrashuvda (5:1) uchta to‘p kiritib, ajoyib o‘yin namoyish etdi va muxlislar olqishiga sazovor bo‘ldi.

So‘nggi ikki mavsum davomida jiddiy qiyinchiliklarga duch kelgan, ruhiy salomatligidagi muammolar haqida ochiq gapirgan Foden uchun bu o‘yin burilish nuqtasi bo‘lishi mumkin. Pep Gvardiola davrida asosiy tarkibdagi o‘rnini yo‘qotgan va 10 oy davomida gol urolmagan futbolchi, nihoyat, o‘tgan haftada «Ipsvich» darvozasini ishg‘ol qilib, «qora chiziq»qa chek qo‘ygan edi. Hozirgi mavsum ham uning uchun oson kechmayotgan bo‘lib, «Manchester Yunayted» bilan derbida maydondan chetlatilgan vinger Mareska jamoasida o‘z o‘rnini qaytarib olish uchun tinimsiz kurashmoqda.

Erling Xolandning zaxirada qoldirilishi va Antuan Semenyoning jarohati tufayli maydonga tushgan Foden avvaliga chap qanotda, so‘ngra «yolg‘on to‘qqizlik» vazifasida harakat qilib, butun hujum chizig‘ini o‘z ortidan ergashtirdi. Jamoa bosh murabbiyi Mareska uning o‘yinidan nihoyatda mamnunligini ta’kidlab, Fodenning qaytishi klub uchun qo‘shimcha kuch va muhim qurol ekanligini qayd etdi.

Ushbu yorqin het-trik Angliya terma jamoasi bosh murabbiyi Tomas Tuxelning ham e’tiboridan chetda qolmasligi aniq. Bir paytlar mamlakatning eng yorqin iqtidori sanalgan, biroq so‘nggi yirik musobaqalardan chetda qolib ketgan vinger Millatlar ligasi o‘yinlari oldidan o‘zining terma jamoa talablariga to‘liq javob berishini isbotlashga va murabbiylar ishonchini to‘liq qaytarishga harakat qilmoqda.

Source: www.aljazeera.com