Samarqand shahrida bolalar kelajagi va farovonligiga bag'ishlangan xalqaro sammit o'z ishini boshladi. Tadbirda mamlakat rahbariyati so'nggi yillarda amalga oshirilgan islohotlar natijasida bolalar kambag'alligi deyarli to'rt baravarga kamaygani hamda maktabgacha ta'lim qamrovi 27,7 foizdan 78 foizga oshgani haqida ma'lum qildi.

Shuningdek, chiqishlar davomida har bir bola uning millati, tili, dini yoki oilasining daromadidan qat'iy nazar teng imkoniyatlarga ega bo'lishi shartligi ta'kidlandi. Rasmiylarning ta'kidlashicha, onalar o'limi va bolalarda rivojlanishdan qolish holatlari ikki baravarga qisqargan, oliy ta'lim olish imkoniyati esa 9 foizdan 45 foizgacha kengaygan.

Shu bilan birga, mamlakatda inklyuziv ta'limni rivojlantirish va nogironligi bo'lgan bolalarni qo'llab-quvvatlash borasida ham qator rejalar ilgari surildi. Xususan, so'nggi yillarda inklyuziv maktablar soni besh baravarga ko'payib, nogironligi bo'lgan bolalarning 85 foizdan ortig'i ta'lim xizmatlari bilan qamrab olingani aytildi.

Tadbirda xalqaro hamkorlikni kuchaytirish, jumladan, bolalar onkologiyasi va og'ir kasalliklarni erta aniqlash hamda davolash masalalariga alohida e'tibor qaratildi. Bundan tashqari, internet makonida bolalar xavfsizligini ta'minlash, kiberbullizmga qarshi kurashish va raqamli savodxonlikni oshirish muhim yo'nalishlardan biri sifatida belgilandi.

Source: podrobno.uz