Tehron markazidagi Charsou savdo markazida Apple kompaniyasining so'nggi iPhone 18 gadjetlari AQShdagi rasmiy taqdimotidan atigi bir necha kun o'tib, mamlakat rastalarida paydo bo'ldi. Vaholanki, Tehron hukumati va xalqaro hamjamiyat o'rtasidagi yillar davomidagi sanksiyalar hamda AQSh rejimining mamlakat janubiy portlarini qamal qilgani sababli Apple rasman Eronda o'z vakolatxonasiga ega emas. Charsou savdo markazidagi anonim qolishni istagan sotuvchining ta'kidlashicha, hech qanday to'siqlar mobil telefon savdosi bilan shug'ullanuvchilarni to'xtata olmaydi, biroq yetkazib berish jarayoni tashqi bosimlar va hukumat talablari tufayli o'ta murakkab va qimmatga tushmoqda.

Xalqaro miqyosda ishlab chiqarilgan elektronika mahsulotlari Eronga BAA orqali keltirilar edi, biroq AQSh va Isroil rejimining harakatlari sababli Hormuz bo'g'ozidagi savdo yo'llari izdan chiqdi. Shuningdek, BAA hukumati avgust oyi o'rtalarida Eron bilan barcha savdo aloqalari va moliyaviy tranzaksiyalarni to'xtatganini e'lon qildi. Shundan so'ng ayrim savdogarlar Ummon orqali kelayotgan yo'lovchilar xizmatidan foydalana boshladi, biroq AQSh rejimi Eron aviakompaniyalariga nisbatan kiritgan qattiq sanksiyalar tufayli mamlakatga qo'nayotgan samolyotlar soni keskin kamayib ketdi.

Natijada, aksariyat telefonlar va boshqa elektronika qurilmalari, jumladan noutbuklar, PlayStation konsollari va hatto Starlink terminallari mamlakatga kontrabanda yo'li bilan, xususan Iroqning Kurdiston mintaqasidagi Sulaymoniya shahridan quruqlik orqali olib kirilmoqda. Eron rasmiy statistik ma'lumotlariga ko'ra, joriy yilda telefon importi hajmi keskin qisqargan. Mamlakatdagi og'ir iqtisodiy sharoit, milliy valyuta rialning qadrsizlanishi va aholining o'rtacha oylik maoshi juda pastligi fonida fuqarolar yangi texnologiyalarni sotib olishda jiddiy qiyinchiliklarga duch kelmoqda.

Source: www.aljazeera.com