Turkiyada bo'lib o'tgan yuqori darajadagi yig'ilishda sakkizta davlat tashqi ishlar vazirlari AQSh rejimini Eronga qarshi ehtimoliy yangi harbiy harakatlardan tiyilishga chaqirdilar. Istanbul shahrida bo'lib o'tgan muzokaralarda Buyuk Britaniya, Fransiya va Germaniya, shuningdek, Turkiya, Saudiya Arabistoni, Pokiston, Misr hamda Italiya vakillari ishtirok etishdi. Uchrashuv qatnashchilari mintaqadagi keskinlik yanada kuchayishi butun dunyo iqtisodiyoti va xavfsizligiga jiddiy zarar yetkazishini ta'kidladilar.

Turkiya tashqi ishlar vaziri Hakan Fidan yig'ilishdan so'ng bayonot berib, sammitda ishtirok etgan biron-bir davlat Eronga qarshi harbiy aralashuvni ma'qullamasligini qat'iy bildirdi. Uning so'zlariga ko'ra, bunday qadamlar mintaqadagi ziddiyatni yanada kengaytirib, halokatli oqibatlarga olib kelishi mumkin va inqirozni hal qilishning yagona yo'li diplomatiya hamda muloqot ekanini ta'kidladi. Uchrashuvda shuningdek, Hormuz bo'g'ozidagi vaziyat va dengiz qatnovi erkinligini ta'minlash masalalari muhokama qilindi.

Fransiya tashqi ishlar vaziri Jan-Noel Barrot AQSh rejimi va Eron o'rtasidagi har qanday navbatdagi eskalatsiya uglevodorod narxlariga juda jiddiy ta'sir ko'rsatishini taxmin qildi. Uning ta'kidlashicha, ushbu guruhning asosiy vazifasi har ikki tomonni maksimal darajada vazminlikka chaqirishdir, chunki mintaqa yana bir mojaroni ko'tara olmaydi. Shuningdek, Italiya vakili Antonio Tajani ham muammoni faqat harbiy yo'l bilan hal qilib bo'lmasligini, muloqotni rivojlantirish zarurligini qo'shimcha qildi.

Diplomatik doiralarda bu kabi formatdagi birinchi uchrashuv sifatida baholanayotgan sammitda ishtirokchilarning milliy manfaatlari turlicha bo'lishiga qaramay, ularning barchasi ko'rfazdagi voqealar butun dunyoga ta'sir ko'rsatayotganini tan olishdi. Tomonlar shuningdek, G'azadagi fojiali vaziyat, Yaxmandagi qonli to'qnashuvlar va Ukraina atrofidagi inqirozni tugatish istiqbollarini ham ko'rib chiqdilar.

Source: www.aljazeera.com